«Հայրենիք» կուսակցության նախագահ Արթուր Վանեցյանն այսօր հրավիրվել էր ԱԱԾ՝ մի գործով բացատրություն տալու:
Այսօր ԱԱԾ նախկին պետը փաստաբան Լուսինե Սահակյանի հետ նշանակված ժամին ներկայացավ իր նախկին աշխատավայր: Նա շենք մտնելուց առաջ իրեն սպասող լրատվամիջոցներին խոստացավ, որ հարցերին կպատասխանի դուրս գալուց հետո:
Շենքից դուրս գալով՝ Արթուր Վանեցյանն ասաց, որ հրավիրվել է մի անհեթեթ գործի շրջանակներում: «Որեւէ կարգավիճակ չունեմ: Նյութերի պատրաստման շրջանակներում եմ հրավիրվել բացատրություն տալու համար: Նշեմ, որ որեւէ պարտավորություն չունեի գալու: Բայց հարգելով ինստիտուտը՝ այցելել եմ եւ հրաժարվել եմ բացատրություններ ներկայացնելուց»,- ասաց նա:
Լրագրողները հետաքրքրվեցին՝ հայտարարվել է, թե պաշտոնական դիրքի չարաշահում է տեղի ունեցել: Արդյոք դա այդպե՞ս է: «Ի՞նչ ասել է՝ պաշտոնական դիրքի չարաշահում, հավանաբար, իմ փաստաբանը կպարզաբանի: Իսկ իրականում ոչինչի մասին է այս գործը, հերթական շինծու եւ քաղաքական նպատակներ հետապնդող: Վերջին ութ ամիսների ընթացքում իշխանություններն ամեն կերպ փորձում են իմ նկատմամբ իրականացնել քրեական որեւէ հետապնդում՝ նպատակ ունենալով կասեցնել իմ ակտիվ քաղաքական գործունեությունը: Դուք շատ լավ գիտեք՝ մեղադրանքները, որ հնչեցրել են իմ հասցեին, որեւէ մեկը չի հաստատել»,-պատասխանեց Արթուր Վանեցյանը եւ մի քանի բառով ներկայացրեց, թե ինչով է անհեթեթ պատրաստվող այս գործը:
Կարդացեք նաև
«2018 թվականին աշխատանքի է վերականգնվել մեր նախկին աշխատակիցներից մեկը, որը ըստ ԱԱԾ մեկնաբանության, իրավունք չուներ վերականգնվելու: Բայց երեւի օրենքի ընթերցման եւ հասկանալու հետ կապված խնդիրներ ունեն: Ոչ թե ԱԱԾ աշխատակիցները կամ քննիչները, այլ օրենքի ընթերցման հետ խնդիրներ ունեն Հայաստանի Հանրապետության քաղաքական ղեկավարությունը, ինչպես նաեւ այսօրվա ԱԱԾ գործող տնօրենը: Որովհետեւ, եթե օրենքը կարդային մինչեւ վերջ, կհասկանային, որ օրենքի որեւէ խախտում տեղի չի ունեցել»,-մեկնաբանեց Արթուր Վանեցյանը:
Աշոտ ՀԱԿՈԲՅԱՆ
