«Պետք է սահմանափակումները վերանայվեն: Հավաքների բացարձակ, ամբողջական արգելքը ևս տրամաբանական և հիմնավոր չէ: Գոնե առ այսօր ամբողջական արգելքի հիմնավորում ես չեմ լսել»,- Մարդու իրավունքների պաշտպանի և մի շարք հասարակական կազմակերպությունների համագործակցությամբ անցկացվող «Հավաքների ազատությունը նոր տեսակի կորոնավիրուսային (COVID-19-ի) համաճարակի հիմքով հայտարարված արտակարգ դրության պայմաններում» թեմայով առցանց քննարկմանն այսպիսի կարծիք հայտնեց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:
Նա շեշտեց, որ սա ոչ միայն իր մոտեցումն է, այլ Հանրային խորհրդի:
Միևնույն ժամանակ Դանիել Իոաննիսյանն ասաց, որ արտակարգ դրության պայմաններում հավաքների ազատության սահմանափակումները հիմնավոր և տրամաբանական են: Նա օրինակ բերեց ԲՀԿ հավաքը, որից օրեր անց եղավ հիվանդացության բռնկում հենց ԲՀԿ պատգամավորների շրջանում: Նա ասաց, որ Հանրային խորհուրդը որոշ առաջարկներ է ներկայացրել կառավարությանը: Այնուհետև մանրամասնեց. «Կարելի է թույլ տալ որոշ տեսակի հավաքները կամ հավաքները թույլ տալ ինչ-որ առումով: Հանրային խորհուրդն առաջարկել է ՀՀ կառավարությանը մինչև 30 անձի մասնակցությամբ խաղաղ հավաքները թույլ տալ: Ըստ այդ առաջարկի՝ անկախ դա ենթադրում է հավաքների մասին օրենքով, թե ոչ, պետք է տեղեկացնել ՀՀ ոստիկանությանը, պարտադիր պահանջ լինի նախապես տեղեկացնել ոստիկանությանը հավաքի մասին, հավաքի մասնակիցները լինեն հեռավորության վրա, կրեն դիմակներ, չպետք է խոչընդոտեն ճանապարհային երթևեկությանը, սահմանվի տևողությունը երեք ժամ»:
Մարդու իրավունքների պաշտպան Արման Թաթոյանն այս առիթով արձագանքեց. «Լեգիտիմ կլինեն պետության գործողությունները, եթե մենք սահմանենք կոնկրետ կանոններ, դրանց հետևենք: Հետագայում խախտումների դեպքում պետության համար ավելի հեշտ և լեգիտիմ են դառնում գործողությունները»:
Կարդացեք նաև
Դանիել Իոաննիսյանը նաև նշեց, թե չի կարծում, որ ոստիկանության թիվը հավաքի վայրում համաչափության գնահատման չափորոշիչ է: Նա պարզաբանեց. «Ոստիկանությունը հավաքի վայրում այնքան թվով ուժեր է կենտրոնացնում, ինչքան կանխատեսվում է հավաքի մասնակիցների թիվը: Իհարկե, կարող է և սխալ կանխատեսվել»:
Տաթև ՀԱՐՈՒԹՅՈՒՆՅԱՆ
