«Ադրբեջանը կարծես թե վերջին ժամանակահատվածում՝ տավուշյան մարտերից հետո, չի կարողանում համակերպվել այն մտքի հետ, որ իսկապես կրել է բավականին մեծ կորուստներ թե′ բարոյական առումով, թե′ մարտի դաշտում, և փորձ է կատարում այդ համատեքստում նաև սրել իրավիճակը՝ սադրելով»,- «Արարատ» մամուլի ակումբում լրագրողների հետ հանդիպմանը հայտարարեց թուրքագետ, ռազմագետ Կարեն Հովհաննիսյանը:
Նա փաստեց՝ Ադրբեջանը փորձում է օգտագործել նույնիսկ այնպիսի զինտեխնիկա և զենքեր, որոնք կարծես ընդունված չեն հրադադարներ խախտելու դեպքում օգտագործել շատ ավելի խոշոր ռազմական բախումներում:
Ըստ Կարեն Հովհաննիսյանի՝ Թուրքիան վերջին շրջանում շատ ավելի շատ է հետաքրքրված Ադրբեջանի և հայ-ադրբեջանական հարցով, քան 2016-ին էր: Ըստ նրա՝ իրականում Թուրքիայի հետաքրքրությունը ոչ այդքան շատ Ադրբեջանն է, որքան նա փորձ է կատարում հենց այս տարածաշրջանում իր սեփական ներկայությունը, դերակատարությունն ունենալ:
Aravot.am-ի դիտարկմանը՝ Թուրքիան համառորեն փորձում է տարածաշրջանում թելադրող դառնալ և հարցին՝ նրան կհաջողվի՞ Նախիջևանն իրենը դարձնել, քանի որ այդ ուղղությամբ Թուրքիան այս պահին էլ աշխատանքներ է տանում: Ո՞րը կարող է լինել Թուրքիայի այս ծրագրին խոչընդոտող քաղաքականությունը հայկական կողմից, Կարեն Հովհաննիսյանը պատասխանեց. «Թուրքիան նկրտումներ ունի, որ իր տարածքներն ընդլայնի և ներգրավվածություն ունենա տարբեր տարածաշրջաններում՝ Սիրիայում, Իրաքում, Լիբիայում: Այս դեպքում ևս Թուրքիայի՝ Նախիջևանում վարած քաղաքականությունը տանում է նրան, որ Նախիջևանը պետք է թուրքականացվի: Բայց չեմ կարծում, որ Թուրքիային կհաջողվի Նախիջևանը միացնել իր տարածքին և ամբողջական Թուրքիա դարձնել: Դրա համար բավականին երկար գործընթացներ են հարկավոր, որոնց միջով Թուրքիան անցնել չի կարող: Այստեղ նա գործ ունի նաև ադրբեջանական իշխանության հետ, և այն երբեք չի գնա Նախիջևանն ուղիղ Թուրքիային հանձնելուն: Այն Թուրքիայի համար ռազմաբազա է բաց երկնքի տակ, սակայն այն դեռևս պատկանում է Ադրբեջանին: Նախիջևանը, միասնական Թուրքիայի տարածք դարձնելով՝ նա ուզում է ներգրավվել այս տարածաշրջանում: Հենց Նախիջևանում բախվում են մի կողմից Թուրքիայի և Ադրբեջանի, մյուս կողմից ՌԴ-ի, Իրանի և Հայաստանի շահերը և այստեղ երբեք թույլ չեն տա, որ Թուրքիան գնա որևէ սադրանքի»:
Կարդացեք նաև
Մեր մյուս հարցին՝ ՀՀ ԱԺ «Իմ քայլը» խմբակցության ղեկավար Լիլիթ Մակունցը հայտարարեց, որ Թուրքիան չի գնա հակամարտության մեջ որպես կողմ ներգրավվելու ճանապարհով, քանի որ աշխարհը դա կընկալի Հայոց ցեղասպանության համատեքստում, և բացի այդ Թուրքիան արդեն մի շարք տարածաշրջաններում հակամարտության կողմ է. արդյոք սրանք բավարա՞ր երաշխիքներ են պնդելու, որ Թուրքիան հակամարտության կողմ չի դառնա, Կարեն Հովհաննիսյանն արձագանքեց. «Համամիտ չեմ այդ մտքի հետ: Թուրքիայում տեղի ունեցող նույնիսկ ներքին քաղաքական ցանկացած զարգացում անպայման կապում են Հայաստանի հետ: 2016-ի ձախողված ռազմական հեղաշրջման ժամանակ ՀՀ-ից փորձեցին ներքաշել այդ դավադրության մեջ: Սա շատ լավ առիթ է Թուրքիայի համար, որպեսզի նա ներքաշվի: Չմոռանանք, որ Թուրքիան մշտապես սատարում է Ադրբեջանին, հակամարտության մեջ է, բայց միջնորդավորված: Սակայն կարող է մի պահ գալ, որ Թուրքիան ոչ թե միջնորդավորված կլինի հակամարտության մեջ, այլ հայ-ադրբեջանական, արցախա-ադրբեջանական սահմանից որևէ գործողություն կիրականացնեն»:
Անդրադառնալով Պուտին- Էրդողան հեռախոսազրույցին՝ Կարեն Հովհաննիսյանն ասաց. «Կարծես Պուտինը Էրդողանին հասկացրեց, որ այս տարածաշրջանում անելիք չունի: Հենց այն, որ Ադրբեջանի և Հայաստանի միջև ծագած հարցերի պարզաբանումները Մոսկվայում են լինելու: ՌԴ-ն իր տեղը ցույց տվեց էրդողանին տարածարջանային այս հարցի վերաբերյալ: Ամեն դեպքում Էրդողանը փորձ է կատարում ստանձնել տարածաշրջանում լիդերի դերը»:
Հիշեցմանը՝ Նիկոլ Փաշինյանը հայտարարել է, որ եթե Իլհամ Ալիևը հայտարարում է, որ ՀՀ վարչապետը պետք է ԼՂՀ-ն ներկայացնի բանակցային սեղանի շուրջ, ապա ոչ միայն ես, այլևս Ալիևը համարում է՝ Արցախը Հայաստան է և վերջ, Կարեն Հովհաննիսյանն արձագանքեց. «Ավելացնելու ոչինչ չկա, ամեն ինչ ասվեց դրանով: Իսկապես հենց այդպես էլ կա: Ալիևը մի կողմից ռազմատենչ հայտարարություններ է անում, մյուս կողմից էլ այնպիսի հայտարարություններ անում, որ հակասում է ինքն իրեն, որ Արցախը Հայաստան է և վերջ»:
Տաթև ՀԱՐՈՒԹՅՈՒՆՅԱՆ
