ԱՄՆ-ի վեց նահանգում վերջին օրերին գրանցվել է կորոնավիրուսով հիվանդների ռեկորդային աճ, Եվրամիությունում մտածում են սահմանները նորից փակելու մասին, իսկ Առողջապահության համաշխարհային կազմակերպությունը հայտարարել է, որ մի շարք երկրներում երիտասարդությունը չի պահպանում սոցիալական հեռավորության կանոնները, ինչն էլ հանգեցնում է հիվանդության տարածմանը: Այս մասին հաղորդում է BBC-ի ռուսական ծառայությունը:
Ջոն Հոփքինս համալսարանի տվյալներով՝ հուլիսի 30-ի դրությամբ աշխարհում կորոնավիրուսի հաստատված դեպքերի թիվը գերազանցել է 17 միլիոն 200 հազարը, հիվանդության հետևանքով մահացել է ավելի քան 670 հազար մարդ:
Ստեղծված իրավիճակում Եվրամիության իշխանությունները չեն բացառում արտաքին և ներքին սահմանների հնարավոր փակումը: Բայց Ֆրանսիայի առողջապահության նախարարը նախազգուշացրել է, որ պետք է փորձել հնարավոր բոլոր միջոցներով խուսափել դրանից:
Կորոնավիրուսով հիվանդների զգալի աճ է գրանցվել Իսպանիայում, որտեղ իշխանությունները կրկին սահմանում են կարանտինի միջոցառումներ առավել տուժած շրջաններում:
Կարդացեք նաև
Գերմանիայում գիտնականները կարծում են, որ կորոնավիրուսի դեմ պատվաստանյութը կհայտնվի մյուս տարվա կեսերից ոչ շուտ: Համարվում է, որ Գերմանիան այն երկրներից է, որ առավել հաջող է պայքարել համավարակի դեմ: Չնայած դրան երկրի առողջապահության նախարար Յենս Շպանն ասել է, որ խիստ մտահոգված է վերջին օրերի վիճակագրության կապակցությամբ:
Բելառուսի նախագահ Ալեքսանդր Լուկաշենկոն էլ հայտարարել է, որ հաղթահարել է հիվանդությունը «ոտքի վրա»: Նա խոստովանել է, որ հիվանդացել է կորոնավիրուսով, բայց ախտանիշ չի ունեցել:
Ռումինիայի իշխանությունները ևս խստացնում են կանոնները՝ Covid-19-ի նոր ալիքի ֆոնին, դիմակները դառնալու են պարտադիր հասարակական վայրերում, սահմանափակվում են բարերի և որոշ հաստատությունների աշխատանքային ժամերը, հատկապես շատ են երիտասարդության շրջանում վարակվածները:
ԱՀԿ-ի տարածաշրջանային ղեկավար Հանս Կլյուգեն հայտարարել է, որ գնալով ավելի շատ երկրներում գրանցվում են կորոնավիրուսի լոկալ բռնկումներ, մասնավորապես երիտասարդության շրջանում: «Ակնհայտ է, որ պետք է ևս մեկ անգամ մտածենք՝ ինչպես ճիշտ աշխատել երիտասարդության հետ»,-հավելել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
