«Մեր այս ձևաչափով նախորդ հանդիպումից ի վեր, որը տեղի է ունեցել հուլիսի 6-ին, նոր տիպի կորոնավիրուսի համաճարակային իրավիճակը Հայաստանի Հանրապետությունում էականորեն բարելավվել է»,- պարետատան նիստից հետո ասաց վարչապետ Նիկոլ Փաշինյանը։
Նրա խոսքերով՝ վերջին 4-5 օրերի տվյալներով կարելի է ասել, որ կորոնավիրուսի ամենօրյա նոր դեպքերի թվով վերադարձել ենք մայիսի վերջին գրանցված հիվանդության դեպքերի մակարդակին․ «Ծանր հիվանդների թվով վերադարձել ենք մայիսի վերջի մակարդակին, և ծայրահեղ ծանր հիվանդների թվով վերադարձել ենք հունիսի սկզբի մակարդակին։ Իհարկե՛, այս համեմատությունը հարաբերական է, որովհետև ցավոք, ծանր և ծայրահեղ ծանր հիվանդների վիճակագրությունը նվազել է ոչ միայն բուժումների, այլև մահվան դեպքերի պատճառով։
Այսօրվա դրությամբ Հայաստանում 723 մահ է գրանցվել կորոնավիրուսից։ Եվ ես ուզում եմ մեր ցավակցությունը հայտնել բոլոր մահացածների ընտանիքներին, հարազատներին։ Բայց ակնհայտ է, որ կորոնավիրուսի հաղթահարման փուլ է սկսվել Հայաստանի Հանրապետությունում։ Եվ ակնհայտ է նաև, որ այդ բարելավումը ուղղակիորեն կապված է կառավարության ձեռնարկած հակահամաճարակային միջոցառումների հետ, և այդ հակահամաճարակային միջոցառումների անկյունաքարը մեր համոզմամբ՝ դիմակների պարտադիր կրումն է փակ և բաց տարածքներում»։
Նիկոլ Փաշինյանը ընդգծեց, որ սահմանափակումները թուլացումը իրենց ամենօրյա օրակարգի հարցն է․ «Որևէ մեկը կառավարությունից ավելի շահագրգռված չէ այդ հարցում։ Բոլոր այն դեպքերում, երբ մենք տեսնում, որ կա այդպիսի օբյեկտիվ հնարավորություն, մենք օգտագործում ենք այդ հնարավորությունը, և կայացվում է և կկայացվեն որոշումներ, իսկ այն մասերով, որոնցով այդ որոշումը չի կայացվում, նշանակում է, որ մենք տեսնում ենք, որ դեռևս Հայաստանը հակահամաճարակային կանոնների այդպիսի թուլացումների պատրաստ չէ»։
Կարդացեք նաև
Ամի ՉԻՉԱԿՅԱՆ
