Այսօր Հանրային ծառայությունները կարգավորող հանձնաժողովը համաձայնություն տվեց Եսայան եղբայրների հիմնադրած «Թիմ» ընկերությանը «Վեոն Արմենիա» (ապրանքանիշը՝ Beeline) ընկերության 100% բաժնետոմսերը գրավադրել «Արդշինբանկում»:
Ավելի վաղ ՏՄՊՊՀ-ն եւ ՀԾԿՀ-ն թույլատրել էին «Թիմ» ընկերությանը ձեռք բերել «ՎԵՈՆ Արմենիա» ընկերության 100% բաժնետոմսերը: Առուվաճառքի այս գործարքի դիմաց վճարելու համար է «Թիմ» ընկերությունը գրավադրում «ՎԵՈՆ Արմենիա»-ի բաժնետոմսերը:
Հանրային ծառայությունները կարգավորող հանձնաժողովի որոշման համաձայն, «Վիմպել-Կոմունիկացիի» հանրային բաժնետիրական ընկերության եւ «Թիմ» ՍՊԸ-ի միջեւ բաժնետոմսերի համաձայնեցված գնով առուվաճառքի գործարքի ֆինանսավորման աղբյուրը վարկային միջոցներն են, որի կապակցությամբ «Թիմ» ՍՊԸ-ի եւ «Արդշինբանկ»-ի միջեւ պայմանավորվածություն է ձեռք բերվել, որ նշված միջոցները կտրամադրի բանկը եւ վերջիններիս միջեւ կնքված վարկային պայմանագրով դրանք վերադարձնելու «Թիմ» ՍՊԸ-ի պարտավորությունների կատարումն ապահովված կլինի՝ ընկերության բաժնետոմսերի գրավով: Այս կապակցությամբ «ՎԵՈՆ Արմենիան» խնդրել է, իր բաժնետոմսերի սեփականության իրավունքը «ԹԻՄ» ՍՊԸ-ին փոխանցելու գործարքի իրականացման նպատակով, համաձայնություն տալ նշված բաժնետոմսերը «ԹԻՄ» ՍՊԸ-ի կողմից «Արդշինբանկում» գրավադրմանը:
Նելլի ԲԱԲԱՅԱՆ
