«90-ական թվականներին հայկական դիվանագիտության մեծագույն հաջողությունը Ղարաբաղը հակամարտության կողմ ճանաչել տալն էր»,- «Արարատ» մամուլի ակումբում ասաց ԱՄՆ Լիհայի համալսարանի պրոֆեսոր, քաղաքագիտության դոկտոր Արման Գրիգորյանը։
Նա նշեց, որ երկու ձեռքով կողմ է, որ հիմնական բանակցողը Արցախը պետք է լինի։
Արման Գրիգորյանի խոսքով՝ պատմական արդարություն եզրը Արևմուտքում ոչ մեկին չի համոզելու․ «Միջազգային քաղաքականության մեջ պատմական արդարություն հասկացություն պարզապես գոյություն չունի։ Նման խոսակցությունները սովորաբար հանդիպում են քմծիծաղների։ Միակ բանը, որ կարող է ազդեցություն ունենալ արևմտյան դիվանագետների, միջազգային իրավունքի մասնագետների վրա՝ ինքնորոշման իրավունքի խնդիրն է։ Իսկ ինքնորոշման իրավունքի խնդրի պարագայում, բնական է, որ Ղարաբաղի ժողովրդի որոշումն է, որ դա Ղարաբաղի ժողովուրդն է անում, ոչ Հայաստանը։ Հետևաբար՝ Ղարաբաղի ժողովրդի հետ պետք է բանակցել, ոչ թե Հայաստանի հետ։ Այսինքն՝ զուտ դիվանագիտական ու իրավական առումով՝ ակնհայտ ճիշտ լուծում է»։
Ամի ՉԻՉԱԿՅԱՆ
