Բուհական ընդունելության քննություններին մասնակցած եւ առաջին հայտով նախընտրելի ֆակուլտետ չընդունված դիմորդներն ու նրանց ծնողներն այսօր եւս ցույց են անում ԿԳՄՍ նախարարության դիմաց: Նրանք նվեր էին բերել նախարար Արայիկ Հարությունյանի համար՝ Աստվածաշունչ եւ խաչ, եւ ցանկանում էին շենք մտնել՝ հանձնելու: Ընդառաջ եկավ ԿԳՄՍ նախարարի խորհրդական Գոհար Մամիկոնյանը, որը պատրաստակամություն հայտնեց նվերն ընդունելու եւ նախարարին տալու: «Նախարարը հավատացյալ մարդ է եւ նվերը կընդունի»,-ասաց տիկին Մամիկոնյանը:
Բողոքավորները պնդեցին, որ անձամբ են ուզում փոխանցել: «Գուցե կարդա եւ սկսի ավելի մարդկային ձեւով վերաբերվել իր մասնագիտությանը եւ ազգանվեր գործունեություն վարել, ավելի մոտ կանգնել եկեղեցուն: Նախարարության մեղքը բարդելով դիմորդների վրա, տեսախցիկների դիմաց չասեմ, թե դա ինչ է…»,-հայտարարեց դիմորդ Հայկ Բաբալյանը:
Գոհար Մամիկոնյանն ի պատասխան վստահեցրեց, որ նախարարության աշխատանքը միտված է միայն ոլորտային բարեփոխումներին եւ դիմորների կողմից մասնագիտական ճիշտ ընտրություն կատարելուն:
Հիշեցնենք, որ ընդունելության նոր կարգի համաձայն՝ առաջնահերթությունը դիմորդի լրացրած առաջին հայտինն է:
Կարդացեք նաև
Դիմորդները հորդորեցին նախարարին փոխանցել նաեւ աստվածաշնչյան ոսկե կանոնը՝ մի վարվիր դիմացինի հետ այնպես, ինչպես չէիր ուզենա, որ քեզ հետ վարվեն:
Լուիզա ՍՈՒՔԻԱՍՅԱՆ
