Ավստրալիայի Նոր Հարավային Ուելսի խորհրդարանի պատգամավոր Հյու ՄաքԴերմոթը դատապարտել է Ադրբեջանի սադրիչ գործողությունները հայ-ադրբեջանական սահմանին, և Ավստրալիայի Դաշնային կառավարությանը կոչ է արել հետևել իր օրինակին:
Հյու ՄաքԴերմոթը, որը 2019թ. այցելել է Հայաստան և Արցախ, նշել է, որ ավստրալահայ համայնքը մտահոգված է Տավուշի ուղղությամբ Ադրբեջանի հարձակումներից և Մեծամորի ատոմակայանին հարվածելու սպառնալիքներից: Խորհրդարանականը դատապարտել է Թուրքիայի և Ադրբեջանի նախագահների գործողությունները, որոնց նպատակն է կյանքի կոչել պանթուրքական ազգայնական քաղաքականությունը, ինչը նախկինում հանգեցրել է ցեղասպանության:
ՄաքԴերմոթը Ավստրալիայի Դաշնային կառավարությանը կոչ է արել դատապարտել Ադրբեջանի գործողությունները և աջակցություն հայտնել Հայաստանի անվտանգությանը: Նրա միջնորդությունը քննարկվելու է խորհրդարանի առաջիկա նիստին:
Պատրաստեց՝ Վիկտորյա ԱՆԴՐԵԱՍՅԱՆԸ
