«Ադրբեջանը խրախուսում է Թուրքիայի ներգրավվածությունը: Կարծում եմ՝ սեփական զինված ուժերի անզորությունը հստակ գնահատելով՝ Ադրբեջանի իշխանությունը գնում է այս կոնֆլիկտում Թուրքիային հնարավորինս ներգրավելու ճանապարհով»,-«Արարատ» մամուլի ակումբում լրագրողների հետ հանդիպմանն այսօր անդրադառնալով Տավուշի սահմանին Ադրբեջանի ռազմական ագրեսիայի վերաբերյալ Թուրքիայի սատարող հայտարարություններին՝ ասաց ԱԺ «Իմ քայլը» խմբակցության ղեկավար Լիլիթ Մակունցը: «Կարծում եմ՝ Թուրքիան չի գնա նման քայլի, որեւէ կերպ կողմ չի հանդիսանա, եւ դա հիմնավորման կետեր ունի»,-համոզմունք հայտնեց Մակունցը:
Նա մատնանշեց պատճառները. «Առաջնահերթ, Թուրքիայի՝ կոնֆլիկտի ուղղակի կողմ դառնալու պարագայում, երբ խոսքը ՀՀ սահմանների հանդեպ Ադրբեջանի ագրեսիայի մասին է, աշխարհը դա կընկալի ցեղասպանության համատեքստում: Երկրորդ, շատ երկրներ են ճանաչել Հայոց ցեղասպանությունը, իսկ Թուրքիան մի շարք տարածաշրջաններում արդեն իսկ կոնֆլիկտների կողմ է: Հետեւաբար, շատ երկրներ չեն ընկալի Թուրքիայի գործողությունները: Վերջինիս հիմնական շարժառիթը պայմանավորված է Ադրբեջանի սուտ քարոզչությամբ, թե իբրեւ ՀՀ-ն գազատար-նավթատար խողովակների հանդեպ ուզում է ոտնձգություն կատարել»:
Լուիզա ՍՈՒՔԻԱՍՅԱՆ
