Վրաստանը և Ադրբեջանը ռազմավարական գործընկերներ են, պաշտոնական Թբիլիսիի դիրքորոշումն անդառնալի է՝ Կովկասում խաղաղությունն այլընտրանք չունի: Ինչպես հաղորդում են վրացական լրատվամիջոցները, այս մասին հայտարարել է երկրի վարչապետի խորհրդական Իռակլի Չիկովանին՝ անդրադառնալով տարածվող տեղեկություններին, թե Ռուսաստանը պատրաստվում է Վրաստանի տարածքով 300 մարտական մեքենա ուղարկել Հայաստան:
Չիկովանիի խոսքով՝ «սա հերթական ապատեղեկատվությունն է, որը կուսակցական կոնկրետ լրատվամիջոցները օգտագործում են քարոզչական նպատակով»: Նա նաև ընդգծել է, որ Թբիլիսիի դիրքորոշումը հստակ է բոլոր գործընկերների համար:
«Ցավոք, սա առաջին դեպքը չէ, երբ կոնկրետ լրատվամիջոցներ փորձում են խեղաթյուրել տեղեկատվությունը և, հետևաբար, ներկայացնել այն, ինչպես իրենց է ձեռնտու»,-հավելել է Չիկովանին:
Պատրաստեց՝ Վիկտորյա ԱՆԴՐԵԱՍՅԱՆԸ
