ԵԱՀԿ ՄԽ համանախագահները ողջունել են հայ-ադրբեջանական սահմանին հաստատված հարաբերական կայունությունը
ԵԱՀԿ Մինսկի խմբի համանախագահները և ԵԱՀԿ գործող նախագահի անձնական ներկայացուցիչ Անջեյ Կասպշիկը հերթական հայտարարությունն են արել՝ հայ-ադրբեջանական սահմանին ստեղծված իրավիճակի առնչությամբ:
Նրանք ողջունել են հայ-ադրբեջանական սահմանին հարաբերական կայունությունը, որ գրանցվել է հուլիսի 16-ից ի վեր: Համանախագահները հորդորել են կողմերին, օգտվելով ստեղծված իրավիճակից, պատրաստվել լուրջ սուբստանտիվ բանակցությունների՝ հակամարտության համապարփակ լուծում գտնելու համար: Նրանք նաև ևս մեկ անգամ ընդգծել են սադրիչ հայտարարություններից և գործողություններից, այդ թվում՝ քաղաքացիների կամ կարևոր ենթակառուցվածքների նկատմամբ սպառնալիքներից զերծ մնալու անհրաժեշտությունը:
Համանախագահները փաստել են, որ վերջին շրջանում համանախագահող երկրների համատեղ ջանքերը քննադատող հայտարարությունները, միակողմանի պահանջների, ձևաչափի փոփոխության առաջ քաշումը նպաստավոր չեն կառուցողական երկխոսության վերսկսման համար:
Համանախագահները վերահաստատել են, որ քաղաքական կամքը լավագույն դրսևորումն է՝ տևական խաղաղության հասնելու համար:
Համանախագահները և Կասպշիկը իրենց երախտագիտությունն են հայտնել միջազգային կազմակերպությունների ղեկավարներին, այդ թվում ՝ ՄԱԿ-ի, ԵԱՀԿ-ի և Եվրամիության առաջնորդներին, որոնք անհապաղ հրադադար հաստատելու կոչեր են արել և աջակցել են իրենց միջնորդական առաքելությանը:
Կարդացեք նաև
Համանախագահները վերահաստատել են, որ 2019 թվականի մարտի 9-ի իրենց հայտարարության մեջ ամրագրված տարրերը և սկզբունքները մնում են ուժի մեջ: Նրանք պատրաստակամություն են հայտնել հանդիպել ղեկավարների կամ նրանց ներկայացուցիչների հետ ցանկացած ժամանակ: Համանախագահները նաև շեշտել են, որ ԵԱՀԿ դիտորդները պետք է հնարավորինս շուտ վերադառնան տարածաշրջան:
Պատրաստեց՝ Վիկտորյա ԱՆԴՐԵԱՍՅԱՆԸ
