Մի խումբ Ռուսաստանի Դաշնության քաղաքացիներ, որոնք ազգությամբ հայ են, և Հայաստանի Հանրապետության քաղաքացիներ, որոնք ցանկանում են ՌԴ մեկնել, հուլիսի 24-ին Հայաստանում ՌԴ դեսպանատան դիմաց էին հավաքվել։
Ցուցարարները նամակ էին գրել Հայաստանում ՌԴ դեսպան Սերգեյ Կոպիրկինին։
«Մի շարք քաղաքացիներ մնացել են Հայաստանի Հանրապետության տարածքում՝ առանց գոյատևելու միջոցների։ Մյուս քաղաքացիները իրենց ընտանիքների միակ կերակրողներն են, որոնք մնացել են Հայաստանի Հանրապետության տարածքում, այլ քաղաքացիների՝ խնամքի կարիք ունեցող տարեց ծնողները գտնվում են Ռուսաստանի Դաշնության տարածքում»,- գրված է հայտարարությունում։ Նրանք խնդրում են քննարկել իրենց՝ ՌԴ վերադառնալու հարցը։ Իրենց խնդրանքը մերժելու դեպքում քաղաքացիները պատրաստվում են հուլիսի 30-ին գնալ Բագրատաշեն։
«Բագրատաշենում կսպասենք այնքան, ինչքան պետք կլինի, նույնիսկ ամիս, մենք այնտեղ կգիշերենք։ Այստեղ մարդիկ փողոցում են գիշերում, իրենք գիշերում են դեսպանատան դռների դիմաց, ի՞նչ տարբերություն»,- ասում էին ցուցարարները։
Կարդացեք նաև
Նրանք ասում էին, որ իրենք պարզապես ցանկանում են մեկնել, ճանապարհածախսը պատրաստ են հոգալ։
Քաղաքացիները բողոքում էին, որ դեսպանատունը չի ընդունում քաղաքացիներին՝ պատճառաբանելով, որ կարանտինի ընթացքում չեն աշխատում։
Դեսպանատնից հրաժարվեցին հանդիպել քաղաքացիներին և վերցնել նրանց նամակը։
Ցուցարարները որոշեցին նամակը գցել դեսպանատան նամակների արկղում։ Եվ լքեցին դեսպանատան տարածքը։
Ամի ՉԻՉԱԿՅԱՆ
