«Քննությունները նաև շատ լավ արտացոլում են մեր երկրի վիճակը»,- «Հոդված 3» ակումբում քննարկման ընթացքում ասաց կրթության փորձագետ Սերոբ Խաչատրյանը։
Նա նշեց, որ քիմիա մասնագիտությամբ մանկավարժության գծով Հայաստանում այս տարի ընդունվել է 3 հոգի, ֆիզիկայի գծով՝ 1 հոգի Շիրակի պետական համալսարանում 9 միավորով․ «Այսինքն՝ սա արդեն երկրի անվտանգության հարց է։ Ֆիզիկայի ուսուցիչ դառնալու համար այս տարի ունենք մեկ հոգի, և դա պարզ էլ չի, թե այդ մեկ հոգին կուզի ուսուցիչ աշխատե՞լ, թե՞ ոչ։ Քիմիայի համար` 3 հոգի։ Հայաստանը տարեկան 20-30 ֆիզիկայի ուսուցչի կարիք է ունենում, եթե մի հոգի է ընդունվել` այս հարցը ո՞նց է լուծվելու։ Նախորդ տարիներին էլ այս գծով ընդունվողների թիվը շատ քիչ է եղել, կարծեմ՝ էլի 3-4 հոգի։
Հիմա մենք շուտով ունենալու ենք մի իրավիճակ, որ ոչ միայն մասնագիտական կողմնորոշում չենք կարողանալու դասավանդել, այլ այնպիսի կարևոր առարկաներ, ինչպիսինն են ֆիզիկան և քիմիան։ Ես կարծում եմ՝ այս իրավիճակում սա շատ ավելի լուրջ հարց է, որովհետև մնացած հարցերը կարող են կարգավորվել տարբեր ձևերով՝ ի վերջո ուսանողները կարող են հեռակա ընդունվել կամ ընթացքում փոխել մասնագիտությունը։ Բայց այս հարցը ո՞նց է լինելու, մարդ չկա։ Մենք հիմա քննարկում ենք այն բևեռը, որտեղ շատ մարդ կա, բայց այս մյուս բևեռը քննարկենք, այստեղ ամայություն է, այստեղ լուծում չունենք, մարդ չկա, ո՞ւմ ենք բերելու, որ դպրոցում դասավանդի։ Ես կուզեի այս հարցը հրատապ քննարկվի կառավարությունում և Ազգային ժողովում, որովհետև եթե մենք ուսուցիչ չունեցանք, այս իրավաբաններն էլ չեն լինի մի քանի տարուց»։
Կարդացեք նաև
Ամի ՉԻՉԱԿՅԱՆ
