Բաքվում ԱՄՆ դեսպանին կանչել են Ադրբեջանի արտգործնախարարություն: Այս մասին հաղորդում են ադրբեջանական լրատվամիջոցները՝ վկայակոչելով ԱԳՆ մամուլի քարտուղար Լեյլա Աբդուլաևայի հայտարարությունը: Ըստ տեղեկատվության՝ ամերիկացի դիվանագետը արտգործնախարարություն է կանչվել Լոս Անջելեսում՝ Ադրբեջանի գլխավոր հյուպատոսության մոտ, հայերի բողոքի ցույցի առնչությամբ։
Ավելի վաղ հաղորդել էինք այն մասին, որ արդեն երկրորդ օրն է, ինչ Կալիֆոռնիայում բնակվող հայերը հավաքվում են Լոս Անջելեսում Ադրբեջանի հյուպատոսության առաջ՝ իրենց բողոքն արտահայտելով ադրբեջանական ագրեսիայի դեմ:
Սոցիալական ցանցերում Լոս Անջելեսի իրադարձությունների վերաբերյալ գրառումներ կան ադրբեջանական օգտահաշվիներում: Օրինակ «Ադրբեջանցիները Լոս Անջելեսում» թվիթերյան էջը շնորհակալություն է հայտնում իրավապահներին՝ ադրբեջանական համայնքի ներկայացուցիչներին պաշտպանելու համար: «Լոս Անջելեսի ոստիկանության սպաները պաշտպանում են ադրբեջանական համայնքի ներկայացուցիչներին հայ դաշնակների հնարավոր բռնությունից: Շնորհակալություն»:
Կարդացեք նաև
Էլին Սուլեյմանով անունով օգտատերն էլ գրել է, որ «ցույցերի ժամանակ մի քանի ադրբեջանցիներ լուրջ վնասվածքներ են ստացել»:
Պատրաստեց՝ Վիկտորյա ԱՆԴՐԵԱՍՅԱՆԸ
