Այսօր Գեղարքունիքի մարզում տեղի ունեցած ավտովթարից մահացել է Գավառի կրակոցների և հիվանդանոց ներխուժելու գործով մեղադրյալ Նարեկ Հովհաննիսյանը:
Նրա պաշտպան Արթուր Հարությունյանը Aravot.am-ին ասաց, որ ծանոթ չէ ավտովթարի հանգամանքներին եւ չի կարող մեկնաբանել դեպքը պատահականությո՞ւն էր, թե՞ նախապատրաստված ավտովթար: Փաստաբանն ասաց նաեւ, որ մահացած պաշտպանյալի հարազատների հետ չի խոսել, դեպքի մանրամասներին չի տիրապետում. «Ես ոնց կարող եմ ինչ-որ բան հերքել կամ բացառել, եթե պատկերացում չունեմ դրա մասին: Ես միայն տվյալ գործի շրջանակում իրականացրել եմ իր պաշտպանությունը առաջադրված մեղադրանքի շրջանակում, ես Նարեկ Հովհաննիսյանի ընտանիքի փաստաբանը չեմ»:
Հիշեցնենք, որ ապրիլի 28-ին Գավառ քաղաքում՝ Գավառի համալսարանի մոտակայքում՝ ժամը 17:40-ի սահմաններում, կրակոցներ էին հնչել։ Արդյունքում` մահացել էր 2 մարդ, 4 հոգի մարմնական վնասվածքներով տեղափոխվել էր հիվանդանոց:
Հիշեցնենք նաեւ, որ մահացած երիտասարդը Գավառի զինված միջադեպից հետո երկու ամիս մնացել էր կալանքի տակ: Նորատուսի համայնքի 287 քաղաքացի ստորագրահավաք էր իրականացրել նրա կալանքը երկու ամսով չերկարաձգելու համար, հունիսի 29-ին Նարեկ Հովհաննիսյանը դատարանի դահլիճից ազատ էր արձակվել:
Կարդացեք նաև
Արփինե ՍԻՄՈՆՅԱՆ
