Ղարաբաղյան հակամարտության կարգավորումը բխում է տարածաշրջանի և աշխարհի բոլոր պետությունների շահերից: Այս մասին ՏԱՍՍ գործակալությանը տված հարցազրույցում ասել է ՌԴ ԱԳ փոխնախարար Ալեքսանդր Գրուշկոն:
«Եթե անդրադառնանք Լեռնային Ղարաբաղի իրավիճակին, ապա կարծում ենք, որ ոչ միայն Ռուսաստանը, այլ նաև մյուս պետությունները, որոնք մտահոգված են այս տարածաշրջանում կայունության հաստատմամբ և ամրապնդմամբ, պետք է հանդես գան հայտարարություններով՝ խրախուսելով կողմերին հաստատել խաղաղություն, դադարեցնել կրակը: Իրավիճակի կայունացումը բխում է գործընթացի բոլոր մասնակիցների շահերից»,-ասել է Գրուշկոն:
ՌԴ փոխարտգործնախարարն ընդգծել է՝ Ռուսաստանը կարծում է, որ ԵԱՀԿ-ի, Մինսկի խմբի շրջանակում միջազգային հանրության կողմից մշակված պայմանավորվածությունները պետք է մնան բանակցային սեղանին: «Ներկայիս ճգնաժամը չպետք է հանգեցնի առաջընթացի նահանջին, որը ձեռք է բերվել առաջին հերթին Ռուսաստանի հսկայական ջանքերի շնորհիվ և մերձեցրել է հակամարտության կարգավորման հեռանկարները»,-ասել է Գրուշկոն:
Նա միևնույն ժամանակ նշել է, որ հակամարտության լուծումը թույլ կտա զգալիորեն առողջացնել տարածաշրջանում ձևավորված մթնոլորտը, ինչպես նաև կլավացնի երկկողմանի հարաբերությունները բոլոր գործընկերների միջև: «Բոլորին, մասնավորապես Մինսկի խմբի երկրներին, կոչ ենք անում նման դիրքորոշում ունենալ»,- հավելել է ՌԴ ԱԳ փոխնախարարը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
