Ինչպես հայտնել էինք, բուհական ընդունելության քննություններին մասնակցած եւ առաջին հայտով նախընտրելի ֆակուլտետ չընդունված դիմորդներն ու նրանց ծնողներն այսօր կրկին ԱԺ-ի դիմաց էին՝ բողոքելու ընդունելության քննությունների նոր կարգից, համաձայն որի՝ առաջնահերթությունը տրվում է դիմորդի լրացրած առաջին հայտին: Երեկ ԳԹԿ-ն պարզաբանել էր հարցը:
Քիչ առաջ «Լուսավոր Հայաստան» խմբակցության պատգամավոր Աննա Կոստանյանը լրագրողներին տեղեկացրեց, որ խնդրի հետ կապված խորհրդարանում քննարկում է եղել, եւ երեք խմբակցությունների մտահոգությունը հետեւյալ հարցադրման մեջ է արտահայտվում՝ ինչպե՞ս է հնարավոր, որ ավելի ցածր միավորներ հավաքած դիմորդն ավելի բարձր հնարավորություններ ունի, քան բարձր միավորներ ստացածը:
«Փաստորեն, գիտելիքը ստորադասվում է այն թույլ հիմնավորմանը, թե դիմորդներն առաջին հայտով շատ հստակ որոշում են կայացրած եղել: Իմ պնդումն այն է, որ 16-17 տարեկան երեխան բավարար կողմնորոշում չունի իր մասնագիտության ընտրության հարցում, որպեսզի կարողանա առաջնահերթություններ դնել: Գուցե կկարողանա, չեմ բացառում եւ չեմ էլ փորձում երեխաների կամքը նսեմացնել: Ուղղակի պետք է հաշվի առնել, որ գնահատում ենք գիտելիքը, ուստի չպետք է ստորադասել գիտելիքն ու բարձր միավորներ հավաքած դիմորդներին: Նման պարագայում որոշում հնարավոր չէր կայացնել, քանի որ որոշում կայացնող մարմինը՝ ԿԳՄՍ-ն, փոխնախարարի կամ նախարարի մակարդակով ներկա չէր: Ներկա էր միայն վարչության պետը, ով ասում էր այն, ինչ լսում ենք վերջին օրերի մեկնաբանություններում»,-նշեց Աննա Կոստանյանը:
Նրա փոխանցմամբ՝ տարօրինակ է եւ անընդունելի, որ ԿԳՄՍ-ից նախարար կամ փոխնախարար չէր եկել հանդիպմանը, ավելին՝ լուծում էլ չի առաջարկվել:
Կարդացեք նաև
Հիշեցնենք՝ 700-ից ավելի դիմորդներ չեն ընդունվել առաջին հայտով նախընտրելի ֆակուլտետներ եւ պահանջում են իրանց համար լրացուցիչ տեղեր սահմանել:
«Ծնողների առաջարկն այն է, որ այս երեխաներին առաջին կիսամյակում տրվի հնարավորություն ապացուցելու, որ իրենք արժանի են ուսանող լինել, իսկ եթե ոչ՝ կշարունակեն սովորել միայն բարձր առաջադիմություն ունեցողները»,-ասաց պատգամավորը:
Ծնողներն ու դիմորդները հայտարարեցին, որ ցույցը շարունակելու են ԿԳՄՍ-ի դիմաց այնքան ժամանակ, մինչեւ նախարար Արայիկ Հարությունյանը կհանդիպի իրենց:
Լուիզա ՍՈՒՔԻԱՍՅԱՆ
