Արդարադատության նախարար Ռուստամ Բադասյանն այսօր մասնակցում էր Հանրային ծառայությունների միասնական գրասենյակի բացմանը, որից հետո լրագրողների հետ ճեպազրույցում նախարարն ասաց. «Այս օրինակով, բոլոր թերություններն ու առավելությունները հաշվի առնելով՝ մենք կմշակենք ծրագիր՝ փուլ-փուլ այն ներդնելու հանրապետության տարբեր հատվածներում»:
Գրասենյակում կլինեն մի քանի պետական մարմինների ներկայացուցիչներ ՊԵԿ, նոտար եւ այլն ու տարբեր պատուհաններին մոտենալով՝ քաղաքացին կարող է մի շարք ծառայություններ ստանալ մի կետից: Ընդ որում, մինչեւ 20 րոպե տեւողությամբ քաղաքացին կարող է օգտվել անվճար ավտոկայանատեղիից: Նախարարը վստահեցրեց, որ 20 րոպեից ավելին գործընթացը չի էլ տեւի. «Ամեն ինչ անելու ենք, որ 20 րոպեից ավելի քաղաքացին կարիք չունենա մնալու միասնական գրասենյակում, դա արդյունավետության կարեւոր բաղադրիչ է լինելու»:
Լրագրողները նախարարին հարցրեցին՝ այդ կենտրոնական հատվածում ավտոկայանատեղին վարձակալությամբ տրվել է մասնավորին, դրանից պետբյուջե մուտքեր արվելո՞ւ են, ի՞նչ են անելու, որ այդքան թանկ տարածքը տրվել է իրեն՝ Բադասյանը պատասխանեց, որ մրցույթ է հայտարարվել, ով ամենալավ պայմանն է առաջարկել՝ նրան է տրվել ավտոկայանատեղիի սպասարկումը»: Հարցին՝ հնարավոր չէ՞ր այնպես կազմակերպել, որ պետությունն ինքը դա աներ, ոչ թե տար մասնավորին՝ նախարարը պատասխանեց, որ տարածքի բարեկարգումը, գծանշումները, սարքերը, ամբողջը մասնավոր այդ կազմակերպությունն է արել. «Նախարարությունը փորձ չունի ու չի ցանկանում ունենալ՝ ավտոկայանատեղիի սպասարկում կազմակերպելու համար: Մենք համապատասխան հմտություններ չունենք, պետք չի վախենալ, որ մասնավորը եկամուտ կունենա, որովհետեւ այդ եկամտից հարկեր են վճարվում»:
Կարդացեք նաև
Հռիփսիմե ՋԵԲԵՋՅԱՆ
