Այսօր ՀՀ պաշտպանության նախարարությունը մարշալ Ա. Խանփերյանցի անվան ռազմաավիացիոն համալսարանում ԶԼՄ-ներին ներկայացրեցին վերջին օրերին Տավուշի ուղղությամբ Ադրբեջանի ձեռնարկած ագրեսիայի ընթացքում ՀՀ ԶՈՒ ստորաբաժանումների խոցած եւ չեզոքացված ԱԹՍ-ների մի մասի մնացորդները:
Համալսարանի ղեկավար, գեներալ-մայոր Դանիել Բալայանը լրագրողներին հայտնեց, որ վերջին օրերին ՀՀ Տավուշի մարզի ուղղությամբ Ադրբեջանի սանձազերծած փաստացի պատերազմական գործողություններն ավելի համոզիչ ցույց տվեցին հայկական բանակի եւ Հայաստանի զինված ուժերի մարտունակության բարձր մակարդակը, ինչն արտահայտվեց նաեւ նրանով, որ հայոց բանակը արհեստավարժ ու ճշգրիտ հաշվարկներով մի քանի օրվա ընթացքում ոչնչացրեց Ադրբեջանի զինանոցում առկա իսրայելական արտադրության՝ բարձր տեխնոլոգիաներով հագեցված եւ մինչ այդ անխոցելի համարվող հետախուզական եւ հարվածային անօդաչու թռչող մեկ տասնյակից ավելի սարքեր: Դրանք հիմա ամենայն մանրակրկիտությամբ հետազոտում են մեր փորձագետները:
Գեներալը նշեց, որ մեր կողմից խոցած ԱԹՍ-ների կորպուսները պատրաստված են Ադրբեջանի գործարաններում, իսկ էլեկտրոնային մասերն ամբողջությամբ իսրայելական են, ինչը Ադրբեջանի եւ Իսրայելի ռազմական արդյունաբերության ոլորտում սերտ համագործակցության ապացույցներ են:
Դանիել Բալայանը նշեց նաեւ, որ այս թռչող սարքավորումների վրա ինչ նոր միջոցներ տեղադրված են, դրանք դառնում են մեզ հայտնի, այսինքն, դա բավականին լուրջ ինֆորմացիոն արխիվ է, որ մենք ստանում ենք:
Կարդացեք նաև
Գեներալ-մայորը նաեւ ասաց, որ իր արած վերլուծությունները ցույց են տալիս, որ այս կտիվն ադրբեջանցիները իրենք իրենց գլխին սարքեցին:
Աշոտ ՀԱԿՈԲՅԱՆ
