«Ղարաբաղը մերն է» վանկարկումներով, «Ալիեւ ռասիստ» ցուցապաստառներով, «Գետաշենը» երգելով՝ երեկ Ֆրանսիայում Ադրբեջանի դեսպանատան առջեւ հարյուրավոր հայեր ինքնաբուխ բողոքի ցույց են արել՝ հեղափոխության օրերին հատուկ «հու-հու» գոռալով ու ծափեր տալով: Բողոքի ակցիան Տավուշի մարզում Ադրբեջանի ռազմական գործողությունների դեմ էր:
ՀՅԴ բյուրոյի անդամ Մուրադ Փափազյանի խոսքով՝ «Հայաստանի եւ Արցախի ղեկավարությունը հայտարարեց, որ մենք բոլորս միասին պատրաստ ենք դիմագրավելու Ադրբեջանի հարձակումներին: Ադրբեջանը, նույնիսկ եթե իսկապես ավելի զինված է, եթե իսկապես բանակի բյուջեն Հայաստանի բյուջեից ավելի բարձր է, պաշտպան մը կա, որ չունի: Ադրբեջանի պետությունը եւ ժողովուրդը չունի մեր ուժը, այն ուժը, որ ունեն մեր զինվորները Արցախի եւ Հայաստանի: Շարունակելու ենք մեր պայքարը, լինելու ենք հայ ժողովրդի կողքին, լինելու ենք միասնական: Մենք ենք իրենց հարստությունը եւ մենք ենք նաեւ Ադրբեջանի կյանքի թշնամիները: Միասին ըլլանք, պինդ ընկերներ, միշտ միակամ»:
Ցուցարարները վանկարկում էին՝ «Արցախը մերն է», «Սփյուռք, Արցախ, Հայաստան», եւ երգում էին մեր օրհներգը՝ ծածանելով եռագույնը Փարիզում Ադրբեջանի դեսպանատան պատուհանների տակ:
Հավաքի վերջում մի խումբ ադրբեջանցիներ փորձել են իրենց դրոշներով սադրել ու հրահրել բախումներ: Հայերը վանկարկում էին՝ «Արցախ, հուպ տուր»:
Կարդացեք նաև
Պատրաստեց՝ Հռիփսիմե Ջեբեջյանը
