Այսօրվա հեռավար ասուլիսում ֆուտբոլի Հայաստանի ազգային հավաքականի գլխավոր մարզիչ Խոակին Կապառոսը խոսեց նաեւ համաշխարհային եւ հայկական ֆուտբոլում կորոնավիրուսի պատճառով առաջացած ճգնաժամի մասին: «Ֆուտբոլը չի կարող լինել առանց մարզասերների, որովհետեւ ֆուտբոլը կիրք է եւ մարզասերները անպայման պետք է լինեն տրիբունաներում: Պետք է ունենալ պատասխանատվության շատ բարձր զգացում, եւ կարծում եմ՝ Հայաստանի ֆուտբոլի ֆեդերացիան այս առումով ճիշտ աշխատանք է տանում, երբ այլ երկրների նման նպաստում է, որպեսզի մարզասերը հետագայում վերադառնա ստադիոն եւ ամեն ինչ ընթանա իր հունով»,- ասաց նա:
Անդրադառնալով Հայաստանում մանկապատանեկան ֆուտբոլի զարգացման՝ Խինես Մելենդեսի ծրագրի մասին, պարոն Կապառոսը նշեց, որ ինքը, երբ ֆուտբոլային կրթություն էր ստանում, սովորում էր հենց Մելենդեսից եւ նրա ներկայիս օգնականներից: «Եթե խոսում ենք ֆուտբոլի զարգացման մասին, պետք է նշենք մարզչական կրթության կարեւորությունը: Եվ եթե այդ մարզիչները, որոնք պետք է աշխատեն մանուկների, պատանի եւ երիտասարդ ֆուտբոլիստների հետ, համապատասխան կրթություն կստանան, դրանից կշահեն այդ ֆուտբոլիստները, որոնք, բնականաբար, լավ ֆուտբոլիստ դառնալու շանս կստանան: Այս կրթական գործընթացների եւ այն միջոցների շնորհիվ, որ ձեռնարկում է ֆեդերացիան, վստահ եմ, որ շատ լավ ֆուտբոլիստներ ի հայտ կգան, որոնք հայկական ֆուտբոլը կտանեն բարձունքներ: Մելենդեսն ու իր թիմը ոչ միայն տեխնիկայով ու տակտիկայով են կրթում մարզիչներին, այլեւ ֆիզպատրաստության առումով»,-ասաց գլխավոր մարզիչը:
Աշոտ ՀԱԿՈԲՅԱՆ
