«Երկար ժամանակ ՀՀ քաղաքացիներն իրենց խնայողությունները ներդնելու միայն մեկ տեղ ունեն՝ բանկային համակարգում. բիզնեսն իր հերթին ֆինանսավորման միայն մեկ տեղ ունի՝ բանկային համակարգը»: Կառավարության այսօրվա նիստում անդրադառնալով Կապիտալի շուկայի զարգացման ծրագրին, ասաց ՀՀ վարչապետ Նիկոլ Փաշինյանը:
Կառավարությունն այսօր հաստատեց Կապիտալի շուկայի զարգացման ծրագիրը: Վարչապետի խոսքով, պետք է հաջորդ փուլ մտնենք, որպեսզի քաղաքացիները հնարավորություն ունենան ոչ միայն բանկերում ավանդներ դնել, այլեւ բորսայից գնել ընկերությունների բաժնետոմսեր, անել ներդրումներ. «Սա այդ ընկերությունների համար հնարավորություն է նոր ֆինանսական միջոցներ ներգրավելու»: Դրա համար, ըստ վարչապետի, պետք է լինեն ընկերությունները, որոնք կառաջարկեն իրենց բաժնետոմսերը, իսկ դրա համար պետք է աշխատեն թափանցիկ. «Հույս ունենք, որ առաջիկա շրջանի այն պրոցեսները, որ մեր տնտեսության մեջ տեղի կունենան, կառավարությունը հավելյալ հնարավորություններ կստանա նպաստելու կապիտալ շուկայի զարգացմանը գործնական, եւ մեր երկրում ի վերջո ֆոնդային բորսան կդառնա ամենաաշխույժ տնտեսական տեղերից մեկը եւ կդառնա մեր տնտեսության զարկերակը»:
Նիկոլ Փաշինյանի խոսքով, եթե երկրում ռեալ ֆոնդային շուկա ձեւավորվի, ապա կարելի է այն համարել տնտեսական հեղափոխության ամենակարեւոր արտահայտություններից:
Փոխվարչապետ Մհեր Գրիգորյանը նշեց. «Այսօրվա բիզնես միջավայրն այնպես չէ, որ գան տեղում մեծ հետազոտություն անեն, գումար ծախսեն, բոլորը ցանկություն ունեն ներդրում անել, բայց ուզում են գործիքը տեսնել արդի ձեւով»: Ըստ նրա, ծրագրի իրականացման արդյունքում արտաքին աղբյուրներից իրական ներհոսք է լինելու:
Կարդացեք նաև
Լուսինե ԲՈՒԴԱՂՅԱՆ
