Հուլիսի 15-ի երեկոյան Մոսկվայում և Սանկտ Պետերբուրգում զանգվածային բողոքի ցույցեր են տեղի ունեցել ՌԴ Սահմանադրությունում փոփոխությունների դեմ:
Ինչպես հաղորդում է Deutsche Welle-ի ռուսական ծառայությունը, տարբեր տվյալներով ոստիկանությունը բիրտ ուժի կիրառմամբ ձերբակալել է շուրջ 150 մարդու, նրանց թվում են լրագրողներ, քաղաքային դումայի պատգամավոր Յուլիա Գալյամինան, անչափահասներ:
Մոսկվայում բողոքի ցույցը կազմակերպվել էր «Ոչ» շարժման կողմից: Ցույցի մասնակիցներն իրենց դժգոհությունն են հայտնել սահմանադրական փոփոխությունների հարցով հանրաքվեի արդյունքների կապակցությամբ: Ցուցարարները վստահ են, որ արդյունքները կեղծված են:
Սանկտ Պետերբուրգում հավաքի ժամանակ միջադեպեր չեն գրանցվել: Այստեղ հազարավոր մարդիկ ստորագրություններ են հավաքել՝ սահմանադրական փոփոխությունները չեղարկելու նպատակով դատարան դիմելու համար:
Կարդացեք նաև
Հիշեցնենք, որ հուլիսի 4-ից ուժի մեջ մտած սահմանադրական փոփոխությունները ՌԴ նախագահ Վլադիմիր Պուտինին հնարավորություն են տալիս կրկին առաջադրվել նախագահական ընտրություններին:
Պատրաստեց՝ Վիկտորյա ԱՆԴՐԵԱՍՅԱՆԸ
