Ռուսաստանը Երևանին և Բաքվին կոչ է անում տարաձայնությունները հարթել բանակցությունների միջոցով: Ինչպես հաղորդում է «ՌԻԱ Նովոստի» գործակալությունը, այս մասին լրագրողների հետ զրույցում ասել է ՌԴ Դաշնության խորհրդի նախագահ Վալենտինա Մատվիենկոն:
«Ինձ՝ որպես ԱՊՀ Միջխորհրդարանական վեհաժողովի նախագահի, դիմել են Հայաստանի և Ադրբեջանի խորհրդարանների նախագահները»,-ասել է Մատվիենկոն:
Նրա խոսքով՝ Ռուսաստանը անհանգստացած է ստեղծված իրավիճակից, քանի որ և՛ Հայաստանը, և՛ Ադրբեջանը բարեկամ, գործընկեր երկրներ են: «Այժմ գլխավորը ոչ թե մեղավորներ փնտրելն է, այլ ռազմական գործողությունների անհապաղ դադարեցումը»,- հավելել է Մատվիենկոն:
Սենատորը նշել է, որ դիվանագիտական ուղիով ձեռնարկվում են բոլոր միջոցները՝ էսկալացիան նվազեցնելու համար, իսկ Ռուսաստանը՝ որպես Մինսկի խմբի անդամ երկիր, ջանքեր է գործադրում այս ուղղությամբ։ Մատվիենկոյի խոսքով՝ ռուսական կողմի դիրքորոշումը պետք է լինի բանակցային գործընթացը, որի արդյունքում էլ պետք է գտնվեն փոխընդունելի լուծումներ:
Կարդացեք նաև
Նշենք, որ ավելի վաղ ԵԱՀԿ գործող նախագահ, Ալբանիայի վարչապետ Էդի Ռաման, անհանգստություն հայտնելով Հայաստանի և Ադրբեջանի սահմանին աճող լարվածության առնչությամբ, կոչ է արել անհապաղ հրադադար հաստատել և վերականգնել առարկայական բանակցությունները:
Պատրաստեց՝ Վիկտորյա ԱՆԴՐԵԱՍՅԱՆԸ
