Քիչ առաջ «Սասնա ծռեր» խմբավորման կողմից ՊՊԾ գնդի գրավման գործով հուլիսի 15-ի նիստին (նախագահող դատավոր Մեսրոպ Մակյան) Մեսրոպ Մակյանը սանկցիա կիրառեց փաստաբան Տիգրան Եգորյանի նկատմամբ:
Հիշեցնենք՝ նախորդ դատական նիստին ընդմիջումից հետո դատական նիստերի դահլիճ չէին ներկայացել «Սասնա ծռեր»-ի ներկայացուցիչ Տիգրան Եգորյանը, ամբաստանյալներ Գագիկ Եղիազարյանը և Վարուժան Ավետիսյանը: Նրանք դատարանին էին ներկայացրել միջնորդություն 23-30 րոպե հետաձգել նիստը, քանի որ իրենք չեն կարողացել աշխատել դատարանի ներսում, ստիպված գնացել են «Երևան մոլ»-ի սրճարան, ինչի պատճառով ճանապարհին ժամանակ են կորցրել: Մեսրոպ Մակյանն այս քայլը որակեց որպես դատարանի նկատմամբ անհարգալից վերաբերմունք:
Այսօրվա դատական նիստին Տիգրան Եգորյանը պատճառաբանեց, որ դատական կարգադրիչներն իրենց դահլիճ չէին տրամադրել աշխատելու համար: Նախագահող դատավորն էլ ասաց՝ ինչի՞ց ելնելով դատական կարգադրիչները պետք է ձեզ դահլիճ տրամադրեին:
Մեսրոպ Մակյանն ի վերջո Տիգրան Եգորյանի նկատմամբ սանկցիա կիրառեց ու հայտարարեց. «Դատարանն արձանագրեց, որ նախկինում դրսևորած վարքագիծը և բերված հիմնավորումները չեն կարող հիմնավոր համարվել Տիգրան Եգորյանի՝ դատական նիստից ուշանալու և քննության հետաձգման պատճառ հանդիսանալու համար, հետևաբար դատարանը որոշում է կայացնում նրա նկատմամբ դատական սանկցիա կիրառել՝ նկատողության ձևով և դրա մասին տեղյակ պահել ՀՀ փաստաբանական պալատին»:
Կարդացեք նաև
Տաթև ՀԱՐՈՒԹՅՈՒՆՅԱՆ
