«Ամերիկայի ձայն». Կալիֆոռնիան կրկին արգելափակվեց: Նահանգապետ Գավին Նյուսոմը պահանջել է դադարեցնել ժամանցի վայրերի, մարզասրահների, եկեղեցիների վերաբացման գործընթացները, քանի որ ԱՄՆ ամենաշատ բնակչություն ունեցող նահանգում կորոնավիրուսի վարակակիրների թիվը կրկին սկսել է աճել:
«Այսօր հայտարարում ենք լրացուցիչ պետական գործողությունների մասին, որոնք վերաբերում են տանը մնալու հորդորին: Պահանջում ենք, որ բոլոր շրջանները փակեն հետևյալ ոլորտները ՝ ռեստորաններ, գինետներ, կինոթատրոններ, ընտանեկան զվարճանքի կենտրոններ, կենդանաբանական այգիներ, թանգարաններ և բոլոր բարերը»,-ասել է նա:
Դեպքերի աճը նաև ստիպել է, որ Կալիֆոռնիայի ամենամեծ շրջաններից երկուսի ՝ Լոս Անջելեսի և Սան Դիեգոյի դպրոցները շարունակեն առցանց գործել:
«Կարևոր եմ համարում բոլորիդ հիշեցնել, որ այս վիրուսը շուտով չի վերանա: Հուսով եմ, որ բոլորս դա գիտակցում ենք: Եվ վիրուսը չի վերանում նաև տաք եղանակի պատճառով: Ուստի բոլորիս պարտականությունն է սթափվել, քանի դեռ չկա պատվաստանյութ և արդյունավետ բուժում այս վիրուսի դեմ»,-ասել է նահանգապետը:
Կարդացեք նաև
Վերջին երկու շաբաթների ընթացքում Կալիֆոռնիայում կորոնավիրուսով հոսպիտալացված մարդկանց թիվը աճել է 28, ինտենսիվ խնամքի կարիք ունեցողների թիվը՝ 20%-ով:
