Ըստ պատգամավորի՝ հեղափոխությունից անմիջապես հետո մշտապես պատրաստ ենք եղել Ադրբեջանի կողմից ցանկացած տեսակի գործողության՝ թե′ ռազմական, թե′ տեղեկատվական գործողությունների առումով, ու այն, ինչ հիմա կատարվում է Իջևանում, նախապես մեզ համար պլանավորված է եղել:
«Իշխանությունն ամեն օր ու անընդհատ անելիք ունի»,-հարցին՝ այն, որ ըստ փորձագետների դիտարկման՝ 2016-ի ապրիլյան պատերազմի ժամանակ ավելի համախմբված էինք և ավելի բաց էինք աշխատում արտաքին լսարանի հետ, արդյոք դրանում իր մեղավորությունն ունի՞ և անելիք ունի՞ իշխանությունը, այսպես պատասխանեց «Իմ քայլը» խմբակցության պատգամավոր Արթուր Հովհաննիսյանը:
«Հոդված 3» ակումբի կազմակերպած ռազմական լարված իրավիճակներում ատելության քարոզի տարածման առանձնահատկությունների ու դրա դեմ պայքարի հնարավորությունների թեմայով տեսաքննարկմանն այս առիթով պատգամավորը նկատեց. «Նախկինում, երբ պետական անվտանգության սպառնալիք կար, բոլորը համախմբվում էին անկախ իրենց ունեցած քաղաքացիական հայացքներից, անկախ նրանից, որ մարդիկ մտածում են, որ այդ պահին կառավարող ուժը հանցագործ է: Նախկինում ընդդիմության դիրքերից հանդես եկող ուժերը մոռանում էին իրենց քաղաքական պայքարի մասին, իսկ այսօրվա ընդդիմադիր դաշտում գտնվողները, որոնք ինձ համար քաղաքական առումով ամենևին էլ ընդդիմություն չեն, հանդես են գալիս անընդունելի դիրքերից և որակումներով: Այն անձինք, ում մասին խոսում եմ, մեծ ազդեցություն ունեն տեղեկատվական մի շարք խողովակների վրա, ինչի հետևանքով էլ խնդիր ենք ունենում հանրությանը ճշգրիտ տեղեկություններ հասցնելու հետ»:
Խոսելով Իջևանում ճգնաժամային տեղեկատվական կենտրոնի ստեղծման մասին, որի աշխատանքները համակարգելու է Արծրուն Հովհաննիսյանը` պատգամավորը նշեց. «Կոչ եմ անում բացառապես հետևել պաշտոնական տեղեկատվությանը: Տվյալ շտաբը, որը ստեղծվել է Իջևանում, նախանշվել, գծագրվել է դեռ «Շանթ 2018» միջոցառումների ժամանակ: Կարելի է ասել, որ մենք հեղափոխությունից անմիջապես հետո մշտապես պատրաստ ենք եղել Ադրբեջանի կողմից ցանկացած տեսակի գործողության՝ թե′ ռազմական, թե′ տեղեկատվական գործողությունների առումով: Այն, ինչ հիմա կատարվում է Իջևանում, նախապես մեզ համար պլանավորված է եղել»:
Կարդացեք նաև
Տաթև ՀԱՐՈՒԹՅՈՒՆՅԱՆ
