Կառավարությունն առաջարկում է «Քաղաքացիական կացության ակտերի գրանցման մասին» եւ «Հանրային ծառայությունների համարանիշի մասին» օրենքներում փոփոխություն կատարելու երեխայի ծննդյան վկայականում ծնողների թույլտվությամբ հանրային ծառայությունների համարանիշը գրել: Բանն այն է, որ սոցիալական ծառայություններից օգտվելու համար այդ համարանիշը պետք է, օրինակ, երեխայի ծննդյան միանվագ նպաստը ստանալու համար սոցիալական ապահովության ծառայություն պետք է գնա, որտեղից պահանջում են հանրային ծառայությունների համարանիշ, որը պետք է տա ոստիկանությունը՝ բնակչության պետական ռեգիստրից:
Այսօր ԱԺ պետաիրավական հարցերի հանձնաժողովի նիստում նախագծի քննարկման ժամանակ արդարադատության փոխնախարար Վահե Դանիելյանն ասաց, որ այլեւս քաղաքացին կարիք չի ունենա ոստիկանության բնակության պետռեգիստր գնա, դռնեդուռ ընկնի: Հետագայում այս ծառայություններն ավելի մատչելի են դարձնելու՝ այլ փաթեթով:
Նախագիծը դրական եզրակացություն ստացավ:
Հռիփսիմե ՋԵԲԵՋՅԱՆ
