Հայաստանի և Ադրբեջանի սահմանին տեղի է ունեցել վերջին տարիների ամենախոշոր զինված միջադեպը, կիրակի օրվանից սկսված փոխհրաձգությունները շարունակվում են: Այս մասին գրում է ռուսական «Կոմերսանտ» պարբերականը՝ անդրադառնալով հայ-ադրբեջանական սահմանին ստեղծված իրավիճակին: Պարբերականը զրուցել է կողմերի ներկայացուցիչների հետ, որոնք հակամարտության էսկալացիայի համար մեղադրում են միմյանց՝ ենթադրելով, որ «սադրանքի նպատակը մարդկանց ներքին խնդիրներից շեղելն է»:
Պարբերականը նշում է, որ հայկական և ադրբեջանական կողմերի վարկածները միջադեպի վերաբերյալ գրեթե նույնն են, բացառությամբ մի կարևոր մանրուքի՝ ով է առաջինը կրակել:
Երևանում հայտարարել են, որ հուլիսի 12-ին՝ կեսօրին, ադրբեջանցի զինծառայողները ՈՒԱԶ մակնիշի ավտոմեքենայով փորձել են մոտենալ հայկական դիրքերին: Այն բանից հետո, երբ հայ դիրքապահները նախազգուշացրել են, ադրբեջանցիները թողել են մեքենան և վերադարձել են իրենց դիրքեր, որից հետո հրետանային կրակ են բացել Հայաստանի ուղղությամբ:
Բաքվի վարկածն այլ է՝ «հայերն են առանց պատճառի խախտել հրադադարի ռեժիմը», գրում է պարբերականը և շեշտում, որ խոսքը Լեռնային Ղարաբաղի մասին չէ, այլ հայկական Տավուշի և ադրբեջանական Թովուզի միջև սահմանի, որտեղ միջադեպեր հազվադեպ են լինում:
Կարդացեք նաև
ՀՀ Բերդ համայնքի ղեկավարը «Կոմերսանտ»-ի հետ զրույցում ասել է, որ խուճապ չկա, մարդիկ պարում են իրենց առօրյա կյանքով:
Պարբերականը նշում է, որ միջադեպից հետո ՌԴ ԱԳ նախարար Սերգեյ Լավրովը հեռախոսազրույցներ է ունեցել Հայաստանի և Ադրբեջանի արտգործնախարարներ Զոհրաբ Մնացականյանի և Էլմար Մամեդյարովի հետ: Բացի այդ՝ ՀՀ ԱԳ նախարարը զանգահարել է ՀԱՊԿ գլխավոր քարտուղարին՝ Ստանիսլավ Զասին, և ներկայացրել մանրամասն տեղեկատվություն հրադադարի ռեժիմի խախտման վերաբերյալ: Բայց կազմակերպության արտահերթ նիստը, որը նախատեսված էր երկուշաբթի, անսպասելի հետաձգվել է՝ անորոշ ժամկետով: Ադրբեջանցի քաղաքագետ, «Վալդայ» ակումբի փորձագետ Ֆարհադ Մամեդովը կարծում է, որ արտահերթ նիստի հետաձգման իրական պատճառը ՀԱՊԿ գլխավոր քարտուղարի դիրքորոշումն է, առավելագույնը ինչ պետք է սպասել հայտարարությունն է այն մասին, որ ՀԱՊԿ անդամ երկրներն անհանգստացած են ստեղծված իրավիճակի առնչությամբ, գրում է «Կոմերսանտ»-ը:
Ադրբեջանի նախագահի աշխատակազմի արտաքին հարցերով բաժնի ղեկավար Հիքմեթ Հաջիևն էլ պարբերականի հետ զրույցում ասել է, որ Բաքուն տեղի ունեցած միջադեպը առիթ չի համարում դաշնակիցներից, մասնավորապես Թուրքիայից օգնություն խնդրելու համար: Այնուամենայնիվ, Անկարան արդեն իսկ դիվանագիտական աջակցություն է ցուցաբերել Ադրբեջանին:
«Կոմերսանտ»-ի զրուցակիցները համակարծիք են այն հարցում, որ հայ-ադրբեջանական սահմանին այս լարվածությունը հեռահար հետևանքներ չի ունենա: «Կարծում եմ սա տեղային բախում է, բավականին խոշոր, քանի որ ադրբեջանական կողմից կան սպանվածներ, օգտագործվել է հրետանի, տանկեր, բայց միայն լոկալ մակարդակով: Ակնհայտ է, որ Ադրբեջանում իրավիճակը բարենպաստ չէ, ինչը կապված է նավթի գների, կորոնավիրուսի, ինչպես նաև էլիտաների ներսում որոշակի բախումների հետ»,-ասել է Կովկասի ինստիտուտի ղեկավար Ալեքսանդր Իսկանդարյանը:
Նման ենթադրություն պարբերականի հետ զրույցում արել է նաև Ֆարհադ Մամադովը: «Մի շարք պատճառներ կան՝ և՛ կորոնավիրուսը, և՛ սահմանադրական, քաղաքական ճգնաժամերը»,-ասել է նա՝ հավելելով, որ Ռուսաստանն իր աջակցությունը չի հայտնել Նիկոլ Փաշինյանին :
Պատրաստեց՝ Վիկտորյա ԱՆԴՐԵԱՍՅԱՆԸ
