Խորհրդարանի հատուկ նիստում այսօր ԲՀԿ-ն ներկայացրեց ԱԺ որոշման նախագիծ, որով նախատեսվում է չեղյալ հայտարարել հավաքների եւ հանրային միջոցառումների արգելքը: Ինչպես հայտարարեց ԲՀԿ քարտուղար Արման Աբովյանը՝ նախագծով առաջարկվում է սահմանել հավաքներ անցկացնելու կանոններ, ըստ որոնց՝ անձինք հավաքներ անցկացնելիս պարտավոր կլինեն միմյանցից պահպանել 1,5 մետր հեռավորություն եւ կրել դիմակներ։
Աբովյանը հիշեցրեց, որ նախագիծը մշակվել է արտախորհրդարանական «Հայրենիք» կուսակցության եւ ՀՅԴ-ի հետ միասին:
Արձագանքելով այս հանգամանքին՝ ԱԺ պաշտպանության եւ անվտանգության հարցերի հանձնաժողովի նախագահ, «Իմ քայլի» պատգամավոր Անդրանիկ Քոչարյանը նկատեց՝ ԲՀԿ-ն ՀՅԴ-ի հետ հին կոալիցիոն հարաբերություններ ունի. «Բայց թողեք, որ «Հայրենիք» կուսակցությունը կայանա: Դեռ չեկիստական բաների մեջ են, կայանալու երկար ճանապարհ պետք է անցնեն: «Հայրենիք» կուսակցությանը հանգիստ թողեք, իսկ ճանապարհ անցած կուսակցությունները թող իրենց օրակարգը կառուցեն: Հարցականներ կան: Մի լուսանկար տեսա, որում հետնամասում նստած է «Հայրենիք» կուսակցության ղեկավարը՝ մեր իշխանության ժամանակ պաշտոնավարած Արթուր Վանեցյանը, իսկ առջեւում՝ նախկին համակարգի ղեկավար Դավիթ Շահնազարյանը եւ այդ համակարգի քաղաքական լիդեր հայտարարած Սահակյանը: Տարօրինակ բաներ կան, ուշադիր եղեք»:
ՀՀ պարետ, փոխվարչապետ Տիգրան Ավինյանն էլ անդրադառնալով ԲՀԿ-ի եւ նրա կողմնակից ուժերի առաջարկին՝ նկատեց. «Սա ենթադրում է, որ վարակի տարածման տեսանկյունից ամենառիսկայինը համարվող միջոցառումները պետք է արգելված չլինեն: Հիշեցնեմ մի միջոցառում, որի պատճառով մոտ յոթանասուն վարակակիր ունեցանք, ուստի նման հավաքներն այս պահին չեն կարող թույլատրվել: Մենք օր առաջ ուզում ենք սահմանափակումները հանել, բայց այս փուլում նման առաջարկ չենք կարող քննարկել»: Այնուհետեւ ԲՀԿ-ի նախագիծը դրվեց քվեարկության: «Իմ քայլը» խմբակցության ղեկավար Լիլիթ Մակունցը հայտարարեց՝ «Իմ քայլը» «դեմ» է քվեարկելու: Ի վերջո, «կողմ» քվեարկեց 21, իսկ «դեմ»՝ 60 պատգամավոր:
Կարդացեք նաև
Լուիզա ՍՈՒՔԻԱՍՅԱՆ
