«Որոշ մեկուսացած ընտանիքներ չեն կարողանում առաքման ծառայություններից օգտվել, սակայն պարետատան թեժ գծից իրենց ասել են՝ ով ավելի լավ է իրեն զգում, թող նա գնա խանութ»,-ԱԺ հատուկ նիստում այսօր հայտարարեց «Լուսավոր Հայաստանի» պատգամավոր Գեւորգ Գորգիսյանը:
ՀՀ փոխվարչապետ, արտակարգ դրության պարետ Տիգրան Ավինյանն արձագանքեց, որ մեկուսացված անձանց սննդի ապահովման խնդրի առնչությամբ գործում է սննդի մատակարարման ցանց, որն աշխատում է ՏԻՄ մարմինների միջոցով. «Եթե անձն ունի սննդի կարիք, ստանում է, իսկ եթե ընտանիքն է վարակված, պետք է փորձել օգտվել առաքման ծառայություններից, որոնք մարտից մեծ ծավալով են աշխատում: Բոլորին խորհուրդ ենք տալիս հնարավորինս զերծ մնալ ավելորդ տեղաշարժից»:
Պատգամավորը նաեւ բարձրաձայնեց՝ ոստիկանները տուգանում են բնության գրկում ընտանիքով մաքուր օդ շնչելու գնացած քաղաքացիներին, եւ սա միտումնավոր տուգանելու տպավորություն է թողնում, ոչ թե համավարակի դեմ պայքարի: Ավինյանը պարզաբանեց, որ նման դեպքերում, միանշանակ, այդ քաղաքացիները չեն իրենց առաջնային թիրախը. «Ոստիկանությանը պետք է խնդրեմ եւ կոչ անեմ զերծ մնալ նման մոտեցումից»:
Հիշեցնենք, որ ՀՀ կառավարությունն այսօր որոշել է կորոնավիրուսի տարածումը կանխարգելելու նպատակով հայտարարված արտակարգ դրության ժամկետը երկարաձգել մինչեւ օգոստոսի 12-ը, եւ իրավունքի ուժով գումարվել է ԱԺ հատուկ նիստ:
Կարդացեք նաև
Լուիզա ՍՈՒՔԻԱՍՅԱՆ
