Ամերիկաբնակ Արթուր Ասլանյանը մի քանի տարի է՝ հաջողություններ է գրանցում կարատեի մրցաշարերում: Մարզիկն «Առավոտ»-ին պատմել է մարտարվեստի աշխարհ մուտք գործելու եւ իր հաջողության գրավականի մասին:
– Արթուր, նախ խնդրում եմ Հայաստանի մարզասերներին տեղեկացրեք ձեր գործունեության մասին. ե՞րբ եք տեղափոխվել ԱՄՆ, ինչպե՞ս եք սկսել զբաղվել կարատեով:
– Կարատեով զբաղվել եմ դեռեւս մանկուց՝ 7 տարեկանից: Կարատեն իմ այրան մեջ է. առանց կարատեի ես ինձ չեմ պատկերացնում: Կարծում եմ՝ ծնվել եմ մարտիկ լինելու համար: Երկար տարիներ ապրել եւ մարզվել եմ Հայաստանում, այնուհետեւ 2017 թ.-ից որոշեցի տեղափոխվել ԱՄՆ եւ ուժերս փորձել մի երկրում, որտեղ շատ մեծ հնարավորություններ կան մարզիկների համար: Իմ մարզական կյանքը հաջողված կարող եմ համարել. այստեղ արդեն բազում խոշոր մրցաշարերի հաղթող եմ դարձել այս 3.5 տարիների ընթացքում:
– Մասնավորապես ի՞նչ հաջողություններ կարող եք առանձնացնել վերջին շրջանի սպորտային կյանքից:
Կարդացեք նաև
– ԱՄՆ տեղափոխվելուց հետո մասնակցել եւ հաղթել եմ միջազգային տարբեր մրցաշարերում՝ Ozawa Cup 3-րդ տեղ (2017), Irvine Open` չեմպիոն (2017), 50 th Annual Championship JKR` չեմպիոն (2017), Los Angeles Օpen` չեմպիոն (2018), California Open` չեմպիոն (2018), Unok Open` չեմպիոն (2019), Hayashi Cup` չեմպիոն (2019), Ozawa Cup` երկու ոճերում բացարձակ չեմպիոն (2019): 2017 եւ 2019 թվականներին ընդգրկվել եմ ԱՄՆ-ի 10 լավագույն ամերիկահայ մարզիկների ցանկում, իսկ 2018-ին ճանաչվել եմ լավագույն մարզիչ:
– Առիթ ունեցե՞լ եք ծանոթանալու կարատեի հայաստանյան մարզաշխարհի զարգացմանը։ Ի՞նչ խնդիրներ կարող եք մատնանշել:
– Հայաստանում կարատեի զարգացման մեջ կարեւորագույն խնդիրներ են մարզիկների ֆինանսավորումը, մարզիչների վերապատրաստումը, սեմինարների կազմակերպումը կարատեի փորձառու վարպետների մասնակցությամբ, ընկերական մարզումների անցկացումը տարբեր երկրների մարզիկների հետ:
– Ասում են` ամեն մարզիկի կյանքում մի ոգեշնչող հանգամանք կա։ Ձեզ ո՞վ կամ ի՞նչն է ոգեշնչում հաղթանակների ճանապարհին:
– Մանուկ ժամանակ ինձ ոգեշնչում էին մարտաֆիլմերն ու դրանց հերոսները, իսկ հետո՝ կատարելության եւ որեւէ մեկին չնմանվելու ձգտումը, սեփական ոճի ստեղծումը: Կարիերայիս լավագույն ձեռքբերումը համարում եմ սեփական մարմնիս եւ միտքիս կանոնավորումը՝ մտքի եւ մարմնի դաստիարակումը:
Զրուցեց
Լուիզա ՍՈՒՔԻԱՍՅԱՆԸ
«Առավոտ» օրաթերթ
11.07.2020
