Ինչպես արդեն հաղորդել ենք, հուլիսի 9-ին հայտնի դարձավ, որ Իտալիան արգելում է մի շարք երկրների քաղաքացիների մուտքը իր տարածք: Հայաստանից բացի՝ ցանկում են նաև Բահրեյնը, Բանգլադեշը, Բրազիլիան, Բոսնիա Հերցեգովինան, Չիլին, Քուվեյթը, Հյուսիսային Մակեդոնիան, Մոլդովան, Օմանը, Պանաման, Պերուն և Դոմինիկյան Հանրապետությունը:
Սա վերաբերում է ոչ միայն վերը նշված երկրների քաղաքացիներին, այլ նաև բոլոր նրանց, որոնք եղել են կամ տարանցիկ կանգառ են ունեցել տվյալ նշված երկրներից մեկում վերջին 14 օրերի ընթացքում: Նշվում է նաև, որ դադարեցվում են բոլոր չվերթները ինչպես ուղիղ, այնպես էլ տարանցիկ: Արգելքը կգործի մինչև հուլիսի 14-ը: Չի բացառվում, որ այն երկարաձգվի:
Որոշումը կայացվել է առողջապահության նախարարի կողմից մի շարք այլ նախարարությունների հետ կայացած քննարկումներից հետո: Իր տեսաուղերձում առողջապահության նախարար Ռոբերտո Սպերանցան նշել է. «Աշխարհով մեկ կորոնավիրուսի համաճարակը գտնվում է իր ամենածանր փուլում: Ստորագրել եմ մի հրամանագիր, որն արգելում է մուտքը և տարանցիկ կանգառը Եվրոպական միությունից դուրս գտնվող բազմաթիվ երկրներից: Դա արել եմ, որովհետև իտալացիները հսկայական զոհաբերություններ են կատարել վերջին ամիսներին, որոնք չեն կարող ի չիք դառնալ: Ծարավությունը կշարունակի գործել առավելագույն զգուշությամբ»:
Անի ՎԱՐԴԱՆՅԱՆ
