«Տուգանքների հարցում համակարգային խնդիրներ կան: ՊՊԾ գնդի ծառայողները, որոնք քաղաքացիների իրավախախտումների վերաբերյալ արձանագրություններ են կազմել, դրանք վարչական վարույթների համար հանդիսանում են ոչ իրավաչափ մեկնարկ: Ոստիկանության այդ ծառայողներն իրավունք չունեն վարչական վարույթ հարուցելու եւ իրականացնելու»,-«Հայելի» մամուլի ակումբում լրագրողների հետ հանդիպմանն այսօր անդրադառնալով դիմակ չկրելու համար ոստիկանների կողմից քաղաքացիներին տուգանելու դեպքերին՝ ասաց փաստաբան Ալեքսանդր Կոչուբաեւը:
«Սխալ հարուցված եւ սխալ իրավական հիմք ունեցող վարույթի վերջնարդյունքը՝ տույժը, տուգանքը, անվավեր վարչական ակտ է եւ ենթակա չէ կատարման»,-նշեց նա:
Բանախոսը տեղեկացրեց, որ քաղաքացին իրավունք ունի երկու ամսում բողոքարկել այդ վարչական ակտերը. «Կոչ եմ անում չվճարել տուգանքները, քանի որ դրանք պատշաճ վարչական ակտեր չեն: Կարող են հիմնավորումներ բերել, բայց ինձ համար գլխադասային փաստաթուղթն այս դեպքում ոստիկանության մասին օրենքն է, ըստ որի՝ ոստիկանն իր լիազորությունները կատարում է պաշտոնի համապատասխան, իսկ ՊՊԾ եւ ոստիկանության զորքերի ծառայողներն այն անձինք չեն, որոնք իրավունք ունեն կազմել վարչական իրավախախտման արձանագրություն եւ իրականացնել վարչական վարույթ»:
Լուիզա ՍՈՒՔԻԱՍՅԱՆ
