Այսօր լրագրողների հետ ճեպազրույցում «Իմ քայլը» խմբակցության պատգամավոր Սիսակ Գաբրիելյանը հարցին, թե ինչու է դիմակ չկրելու համար տուգանքների չափը մեծացնելու նախագիծ բերել, այնուհետեւ հանել շրջանառությունից ՝ պատասխանեց. «Խմբակցությունում քննարկման արդյունքում եկանք այն եզրակացության, որ կոնկրետ այս պահին նպատակահարմար չենք համարում այդ մասով: Կարող եմ տեղեկացնել, որ շրջանառության մեջ դրված նախագծում տուգանքների բարձրացումը մի հոդված էր ընդամենը: Վարչական իրավախախտումների վերաբերյալ օրենսգրքում այդ նախագծով մի շարք այլ փոփոխություններ էին նախատեսված, որոնք ընդհանուր պետք է կանոնակարգեին այդ հարաբերությունները, տնտեսվարողների գործողությունները, բայց նախագիծն ամբողջությամբ է շրջանառությունից հանվել»: Գաբրիելյանը չի բացառում, որ դիմակների տուգանքի մասը հանվի, նախագիծը նորից դրվի շրջանառության մեջ:
Հարցին՝ այն, որ նախագիծը հանվեց՝ նպաստե՞լ է այն մտահոգությունը, որ քաղաքացիները կարող են ընդվզել՝ Սիսակ Գաբրիելյանը պատասխանեց, որ միանշանակ բոլորը միակարծիք չեն դիմակների տուգանքների հարցում. «10 հազար դրամը այսօր Հայաստանում, այո, մեծ գումար է: Իմ անձնական կարծիքով՝ այսօր 10 հազար դրամ տուգանքը, եթե իրավակիրառ մարմինները կարողանան նորմալ վարչարարություն իրականացնել, ապա հնարավոր է գումարի այդ չափի տուգանքով հասնել որոշակի իրավիճակի բարելավման»:
Հռիփսիմե ՋԵԲԵՋՅԱՆ
