Քիչ առաջ ՀՀ կենտրոնական ընտրական հանձնաժողովը (ԿԸՀ) հուլիսի 8-ի նիստում քննարկեց և մերժեց ՀՀ ԱԺ «Լուսավոր Հայաստան» խմբակցության ղեկավարի դիմումը:
Հիշեցնենք, որ ԱԺ «Լուսավոր Հայաստան» խմբակցության ղեկավարը գրությամբ դիմել էր ՀՀ կենտրոնական ընտրական հանձնաժողով՝ վերականգնելու համար ՀՀ ԱԺ «Լուսավոր Հայաստան» խմբակցության մեկ մանդատը։
Նիստի ընթացքում ծավալված քննարկումից հետո ԿԸՀ նախագահ Տիգրան Մուկուչյանը ներկայացրեց ԿԸՀ որոշման եզրափակիչ հատվածը. «Արդեն իսկ ընտրությունների արդյունքում բաշխված մանդատների պայմաններում լրացուցիչ մանդատ տրամադրելու՝ մանդատների ընդհանուր թվի ավելացման լիազորությամբ ԿԸՀ-ն օժտված չէ: ԿԸՀ-ն արձանագրում է, որ կուսակցության տարածքային կամ համապետական ընտրական ցուցակի հերթական հաջորդ թեկնածուին ԿԸՀ արձանագրությամբ տրվում է լիազորությունները վաղաժամկետ դադարեցրած պատգամավորի մանդատը, հետևաբար, եթե որևէ պատգամավորի լիազորություններ վաղաժամկետ դադարեցված չեն,առկա չէ այն իրավական փաստը, որի հիմքով ԿԸՀ-ն այդ մանդատը կարող է տրամադրել մեկ այլ թեկնածուի: ԿԸՀ-ի կողմից մանդատը տրամադրելու լիազորությունները հնարավոր է իրականացնել բացառապես թափուր մանդատ առաջանալու դեպքում»:
Նիստից հետո լրագրողները Տիգրան Մուկուչյանից հետաքրքրվեցին՝ գուցե ԿԸՀ-ն նախադեպային որոշո՞ւմ կայացներ, նա ասաց. «ԿԸՀ-ն պետական մարմին է. ոչ թե նախադեպային որոշումներ է կայացնում, այլ կայացնում է որոշումներ, որոնք պետք է համապատասխանեն ՀՀ օրենսդրության պահանջներին»:
Կարդացեք նաև
Տաթև ՀԱՐՈՒԹՅՈՒՆՅԱՆ
