«ՍԴ նախկին անդամներն իրավունք ունեին դիմելու ՄԻԵԴ, ինչը եւ արել են: Բայց այ ՄԻԵԴ-ը միջանկյալ որոշում պետք է անի, թե ոչ՝ վստահ չեմ»,- այսօր լրագրողների հետ ճեպազրույցում ասաց ԱԺ նախագահ Արարատ Միրզոյանը:
ՍԴ նոր անդամների թեկնածուների առաջադրման հետ կապված նա ասաց, որ անում են այնպես, ինչպես Սահմանադրությունն է ասում. «Կա սահմանադրական փոփոխությունների քննարկող հանձնաժողով, կարծում եմ, ՀՀ նախագահը թերեւս պաշտոնապես դիմի հանձնաժողովին, ԱԺ-ից եւս մարդիկ կան այդ հանձնաժողովի աշխատանքներում ներգրավված, քննարկում են ամենատարբեր առաջարկներ՝ ինչպիսին կլինի վերջնարդյունքում հանձնաժողովի առաջարկը, Աստված գիտի»:
Արարատ Միրզոյանը նաեւ ասաց. «Ես որեւէ միջնորդություն ՍԴ չեմ ներկայացրել: ԱԺ-ն ունի աշխատակազմ, որը, գիտեք, ապաքաղաքական մարմին է եւ իրականացնում է իր պրոֆեսիոնալ գործունեությունը: ԱԺ-ն ՍԴ-ում պատասխանող կողմ է եւ մի շարք հարցերով ներգրավված է: ԱԺ-ն ունի ներկայացուցիչ ՍԴ-ում: Ահա ԱԺ ներկայացուցիչը, գործի նյութերին ծանոթանալու, այն է՝ Վենետիկի եւ ՄԻԵԴ խորհրդատվական կարծիքներին այս գործի առնչությամբ ծանոթանալու իրավունք ունի: Որքանով տեղեկացված եմ, նույնիսկ այդ միջնորդությունից հետո այսօր, այս պահի դրությամբ առնվազն այդ խորհրդատվական կարծիքները հայերեն լեզվով ԱԺ-ին դեռ տրամադրված չեն: Կներեք, պաշտոնական գրագրության լեզուն ՀՀ-ում հայերենն է, դժվար թե առաջիկայում կամ երբեւէ դա փոխվի: Պարտավոր են տրամադրել հայերեն նյութերը, որից հետո ԱԺ ներկայացուցիչն ամբողջական պատկերացում կկազմի այդ կարծիքների ու գործի վերաբերյալ»:
Այն, որ ՍԴ-ում քվորում չի լինում՝ ԱԺ նախագահը զերծ մնաց մեկնաբանել՝ դա համարելով իրենց ներքին աշխատանքային իրավիճակ:
Կարդացեք նաև
Հարցին՝ «Սահմանադրական դատարանի մասին» օրենսդրական փաթեթը նախագահը չի ստորագրել եւ հայտնի չէ՝ դիմելո՞ւ է ՍԴ, թե՞ ոչ, դրա համար 21-օրյա ժամկետ ունի, որի հետո գնդակը ձեր դաշտում է, եթե նա չի դիմում, դուք ստորագրելո՞ւ եք՝ Արարատ Միրզոյանը պատասխանեց. «Մեծ հաճույքով: Ես ՀՀ նախագահի հետ այս թեմայով չեմ խոսել: Կստորագրեմ մեծ հաճույքով, եթե իմ համար օրենսդրորեն, իրավական առումով կբացվի ստորագրելու հնարավորության ժամկետը»:
Հռիփսիմե ՋԵԲԵՋՅԱՆ
