Aravot.am-ը Ինֆորմացիայի ազատության կենտրոնի հիմնադիր Շուշան Դոյդոյանից հետաքրքրվեց՝ արդյոք օրինակա՞ն է ԿԳՄՍ նախարարության կողմից տեղեկատվություն չտրամադրելը՝ Հայաստանի պետական տնտեսագիտական համալսարանի ռեկտորի թափուր պաշտոնի համար բաց մրցույթին դիմած մասնակիցների թվի մասին:
«Այն մերժման հիմքը, որ տրամադրել է ԿԳՄՍ նախարարությունը, չի բխում օրենքի պահանջներից, որովհետեւ Տեղեկատվության ազատության մասին օրենքը հստակ սահմանում է հիմքերի ցանկը, որոնցով պայմանավորված՝ կարող է մերժվել տեղեկատվություն ստանալու հարցումը: Տվյալ դեպքում «նպատակահարմար չենք համարում տրամադրել տեղեկատվությունը» անօրինական, օրենքի պահանջներից չբխող հիմնավորում է:
Ավելին՝ պետք է ասեն, թե օրենքի որ հիմքով են հրաժարվում, տեղեկատվություն տալ, օրինակ` անձնական, ընտանեկան կյանքի գաղտնիություն, պետական ծառայողական գաղտնիք եւ այլն… Այս դեպքերում կարող են հրաժարվել, միաժամանակ հղում պետք է կատարեն այն օրենքի, այն դրույթի վրա, որի հիման վրա կատարվում է մերժումը:
Տվյալ դեպքում այս պայմաններից ոչ մեկն ապահոված չի եղել, եւ ես գտնում եմ, որ այստեղ կա այստեղ օրենքին հակասող մերժման դեպք»,-հայտնեց տիկին Դոյդոյանը:
Կարդացեք նաև
Ինֆորմացիայի ազատության կենտրոնի հիմնադիրն ասաց, որ արժեր գրավոր դիմել եւ եթե նման գրավոր մերժում ստացվեր, դատական կարգով բողոքարկվեր: Բայց քանի որ գրավոր դիմելու դեպքում, ԿԳՄՍ նախարարությունը կարող էր հնգօրյա ժամկետում պատասխանել, ինչի դեպքում տեղեկատվությունը կկորցներ իր իմաստը, իսկ հարցը հրատապ էր, մենք բանավոր ենք դիմել:
Հիշեցնենք, որ ԿԳՄՍ նախարարությունը գաղտնի է պահում ՀՊՏՀ ռեկտորի թափուր պաշտոնի համար դիմած թեկնածուների թվի մասին տեղեկատվությունը հետեւյալ պատճառաբանությամբ.«Մինչեւ հուլիսի 10-ը ժամը 13-ը նպատակահարմար չենք գտնում ասել, թե քանի հոգի է դիմել ռեկտորի պաշտոնի համար: Տեղեկատվություն կտրամադրենք հուլիսի 10-ին ժամը՝ 13:05-ին»: Իսկ դիմումների ընդունման ժամկետն ավարտվում է հուլիսի 10-ին:
Գոհար ՀԱԿՈԲՅԱՆ
