«Այս պահին դիմակների առնչությամբ վարույթ է ընթանում, ուսումնասիրություն է կատարվում: Այս հարցը շատ է քննարկվում, եւ երբ ուսումնասիրությունն ավարտենք, կհրապարակենք»,-ԱԺ արտահերթ նիստում այսօր անդրադառնալով դիմակների վաճառքի բարձր գներին՝ ասաց կառավարության կողմից ՏՄՊՊՀ անդամի թեկնածու առաջադրված Կարեն Սեդրակյանը: «Լուսավոր Հայաստանի» պատգամավոր Սրբուհի Գրիգորյանը նրանից հետաքրքրվել էր, թե գնային քաղաքականության կարգավորման համար ինչ է արվում, որպեսզի քաղաքացին տրամաբանական գնով դիմակ առնի, իսկ տնտեսվարողներն էլ գերշահույթ չստանան:
Սեդրակյանը շեշտեց՝ դիտարկում են նաեւ ահազանգերն այն մասին, որ մարզերում դիմակներն ավելի թանկ են վաճառում, քան Երեւանում. «Բայց մինչ օրս բացառվել է տարբերակը, որ 20 դրամով ձեռք բերեն դիմակն ու վաճառեն 200 դրամով: Ավելին չասեմ, սպասենք ուսումնասիրության ավարտին»:
Սրբուհի Գրիգորյանը հակադարձեց. «Երեկ Սիսիանի սուպերմարկետներից մեկում եռաշերտ դիմակը գնել ենք 200 դրամով»: Կարեն Սեդրակյանը խնդրեց իրեն փոխանցել սուպերմարկետի տվյալները, որովհետեւ եռաշերտ դիմակներն այսօր շուկայում 90-120-150 դրամ արժեն:
Կարդացեք նաև
Լուիզա ՍՈՒՔԻԱՍՅԱՆ
