«Ձեր խմբակցության մի մասը վարակակիր է, մյուս մասը կոնտակտավոր, եւ այդպես էլ կարծես չեն մեկուսացել: Հիմա հավաքվել ենք եւ քննարկում ենք օրինագծեր, որոնց հրատապությունը հասկանալի չի, դրանց մեծ մասը կարող էինք սեպտեմբերին քննարկել»,-ԱԺ արտահերթ նիստում այսօր դիմելով խորհրդարանի արտահերթ նիստ նախաձեռնած «Իմ քայլը» խմբակցության պատգամավորների ներկայացուցիչ Սիսակ Գաբրիելյանին՝ ասաց «Լուսավոր Հայաստան» խմբակցության պատգամավոր Գեւորգ Գորգիսյանը:
«Կան օրինագծեր, որոնք անհրաժեշտություն են, բացի այդ՝ ԱԺ-ն դեռ արձակուրդ չի գնացել: Իսկ եթե տեղեկություններ ունեք, որ որեւէ պատգամավոր մեկուսանալու փոխարեն այսօր այստեղ նստած է, բարձրաձայնեք, ԱԺ նախագահը կարձագանքի»,-հակադարձեց Սիսակ Գաբրիելյանը:
«Տեսնում ենք պատգամավորներ, որոնց վերաբերյալ հայտարարվել է, որ վարակված են: Իսկ կոնտակտավորները պետք է մեկուսանային: Կարծում եմ՝ ձեր ողջ խմբակցությունը պետք է մեկուսանար, բայց չի արել: Իսկ օրինագծերի մի մասը լայն քննարկման կարիք ունեին»,-չհամաձայնեց Գորգիսյանը:
Սիսակ Գաբրիելյանն էլ պնդեց, որ օրակարգում հրատապ հարցեր կան: ԱԺ նախագահ Արարատ Միրզոյանն էլ հավելեց. «Բոլոր այն պատգամավորները, որոնք ցուցում ունեն մեկուսանալու, մեկուսացած են: Իսկ նախկինում կորոնավիրուսով հիվանդ պատգամավորները, օրինակ՝ տիկին Պողոսյանը, 16 օր մեկուսացած է եղել, թեստն էլ բացասական է»:
Կարդացեք նաև
Լուիզա ՍՈՒՔԻԱՍՅԱՆ
