Հուլիսի 6-ին ՀՀ ԱԺ պատգամավոր Արման Բաբաջանյանը «Հանուն Հանրապետության» քաղաքական նախաձեռնության անունից հեռախոսազրույց ունեցավ Հայաստանի Հանրապետությունում Չինաստանի Ժողովրդական Հանրապետության Արտակարգ և Լիազոր Դեսպան, Ն.Գ. պարոն Թիան Էրլունի հետ։
Որպես ՀՀ Ազգային Ժողովի պատգամավոր Արման Բաբաջանյանը խոսեց ՀՀ-Չինաստան հարաբերությունների բարեկամական, ռազմավարական բովանդակության և նշանակության վերաբերյալ, որոնք ուղղված են դեպի ապագան, դիտարկվում են որպես Հայաստանի արտաքին, արտաքին տնտեսական, անվտանգության քաղաքականության դիվերսիֆիկացման կարևորագույն ուղղություններից մեկը։
Արման Բաբաջանյանը շեշտեց, որ «Հանուն Հանրապետության» քաղաքական նախաձեռնությունը միջազգային հարթակներում հավատարիմ է «Մեկ Չինաստան» սկզբունքին, նշելով, որ ինքնիշխանության և փոխադարձ շահերի նկատմամբ հարգանքի հիմքի վրա կառուցված ՀՀ-Չինաստան հարաբերություններում առկա է մեծ չիրացված ներուժ, և որ նախաձենությունը անհրաժեշտ է համարում քաղաքական երկխոսության խորացումը հետևյալ ուղղություններով․
– միջազգային և տարածաշրջանային անվտանգություն,
– ազատ առևտրի ռեժիմի հաստատում, ներառելով ԵԱՏՄ մեխանիզմները,
– ռազմատեխնիկական համագործակցություն,
– լոգիստիկ-ենթակառուցվածքային ոլորտ; մենք հավակնում ենք «հաբի» դերակատարությանը՝ Պարսից Ծոց-Սև Ծով միջմայրցամաքային մայրուղում;
– տարածաշրջանային համագործակցություն 2+1 և բազմակողմ ձևաչափում, առաջին հերթին՝ Իրանի և Վրաստանի մասնակցությամբ,
– վերոնշյալ ուղղություններով ներդրումային քաղաքականություն, այդ թվում՝ «Մեկ գոտի, մեկ ճանապարհ» ռազմավարական նախագծի շրջանակներում, որտեղ մենք հավակնում ենք ծանրակշիռ դերակատարություն ունենալ նախագծի ներքին դիվերսիֆիկացման բարձրացման գործում,
– կրթական և մշակութային համագործակցություն։
Կարդացեք նաև
Ի պատասխան, Դեսպանն իր խոսքում անդրադարձավ ներքաղաքական հարցերի, նշեց, որ այսօր Հայաստանում առաջացել են նոր քաղաքական միավորներ՝ ուժեր, որոնք փորձում են լրացնել բաց թողնված գործերը և այդ իմաստով նաև դիտարկում են մեր նոր քաղաքական ուժին «Հանուն Հանրապետության» քաղաքական նախաձեռնությանը։
Դեսպանը նշեց, որ նրանք հետևում են փոփոխություններին և առաջնորդվում են չմիջամտելու սկզբունքով։
Անդրադառնալով երկրի քաղաքական և տնտեսական անցուդարձին, դեսպանը նշեց, որ կարևորում են գործընթացներում կայունությունը, որպես հիմք տնտեսական զարգացման համար, նշելով, որ Չինաստանը Հայաստանի երկրորդ տնտեսական գործընկերն է Ռուսաստանից հետո։ Համաձայնվելով Արման Բաբաջանյանի խոսքին, դեսպանը նշեց, որ կա չիրականացված մեծ պոտենցիալ և որ դա առաջիկայում իրագործելու հարց է։ Դեսպանը հետաքրքրվեց «Հանուն Հանրապետության» քաղաքական նախաձեռնությունը քաղաքական դաշտի, որ թևն է ծրագրում ընտրել, ի պատասխան հարցին Արման Բաբաջանյանը պատասխանել է, որ նախաձեռնությունը ընտրել է աջ լիբերալ թևը։ Դեսպանը գոհունակություն հայտնեց, որ ստեղծվող քաղաքական նոր միավորն առաջնահերթ կարևորություն է տալիս հայ-չինական հարաբերություններին և այդ իմաստով երկու երկրների միջև դառնալ կարևոր գործընկեր։ Արման Բաբաջանյանը, որպես Ազգային ժողովի անկախ պատգամավոր իր հերթին հայտնեց, որ նախաձեռնությունը պատրաստ է դառնալ ամուր հիմք այդ հարաբերությունների խորացման և ամրապնդման համար։
Արման Բաբաջանյանն իր և նախաձեռնության անդամների կողմից շնորհակալություն հայտնեց Չինաստանի դեսպանին նոր կորոնավիրուսով պայմանավորված Հայաստանին աջակցելու համար։ Ի պատասխան դրան դեսպանը հայտնեց, որ օգնությունը պայմանավորված չի լինելու միայն համավարակի շրջանակներում, լինելու են նաև մարդկանց կյանքի որակի բարձրացման համար ներդրումներ։
Վերջում կողմերը հույս հայտնեցին, որ համավարակից հետո կկարողանան հանդիպել արդեն և ունենալ առարկայական երկխոսություն, իսկ մինչ այդ կապ կարող են հաստատել հեռախոսազրույցների ձևաչափում։
«Հանուն Հանրապետության» քաղաքական նախաձեռնություն
