«Իրատեսի» զրուցակիցն է ԱԺ «Լուսավոր Հայաստան» խմբակցության պատգամավոր ԱՆՆԱ ԿՈՍՏԱՆՅԱՆԸ:
–ՍԴ–ում երեք դատավորների ու Հրայր Թովմասյանի՝ որպես ՍԴ նախագահի լիազորությունները դադարեցված են: Այս մեկ շաբաթում ի՞նչ է փոխվել ՀՀ «հպարտ ու արժանապատիվ» քաղաքացու կյանքում: Համավարակով պայմանավորված պատերազմի պայմաններում՝ ի՞նչ էր այն տալու աշխատանքը կորցնող ու սոցիալական մի շարք խնդիրների բախվող քաղաքացիներին:
-Ազգային ժողովում «Իմ քայլը» խմբակցության կողմից միահեծան ձևով անցկացված փոփոխություններն անդրադառնալու են միմիայն ՍԴ երկու դատավորներին, երրորդ դատավոր Ալվինա Գյուլումյանի վրա դրանք չեն ազդում, սա մեր համոզմունքն է, իսկ իմքայլական պատգամավորների և իշխանության մյուս ներկայացուցիչների համար «սահմանադրական դև» դարձած Հրայր Թովմասյանը շարունակելու է լինել ՍԴ անդամ՝ ի հեճուկս վարչապետի և նրա թիմակիցների։ Ստացվում է՝ օրենք են փոխում՝ օրենք խախտելով, բայց, միևնույն է, վերջնանպատակին չեն հասնում, իսկ քաղաքացու կյանքում ոչինչ չի փոխվում։ Մենք էլ էինք ասում, պնդում, փորձում հասկացնել իշխանություններին, որ ներկայիս սոցիալ-տնտեսական և առողջապահական ճգնաժամի ֆոնին ՍԴ մի քանի դատավորների հարցն այն աստիճանի հրատապ ու առաջնային չէր, որ բանուգործ թողած՝ բոլորն ընկնեն ու փորձեն նեղ անձնական հարցեր լուծել, իսկ այն, որ սա նեղ անձնական, քաղաքական հարց է դարձել, ակնհայտ է: Մեկ անձի խնդիր է բարձրացվել, ինչը ենթադրելու տեղիք է տալիս, որ պետական շահը ստորադասվել է քաղաքական առաջնայնությանը։ Վարակի տարածման ցուցանիշներն ամեն օր գրեթե նույնն են, քաղաքացիներն էլ ավելի են խորանում սոցիալական ճահճում, ուսանողները չեն կարողանում վարձեր վճարել, ինչի պատճառով կարող են դուրս մնալ բուհերից, կրթական ոլորտում բազմաթիվ խնդիրներ կան, կրթական համակարգն առհասարակ կոլապսի մեջ է, առողջապահականում՝ անհասկանալի է, թե ինչ է կատարվում, երկրի տնտեսությունն անհեռանկար ուղղություն է վերցրել, բիզնեսները, իրար հերթ չտալով, փակվում են և այսպես շարունակ։ Հիմա այս իրավիճակում ասել, որ սահմանադրական փոփոխությունները ճգնաժամի մեջ գտնվող քաղաքացու համար կենաց-մահու հարց էին, մեղմ ասած՝ ծաղրի է նման:
–ՍԴ–ի հետ կապված` իշխանությունը հասա՞վ իր նպատակին, թե՞ քաղաքական այլ զարգացումների կարող ենք ականատես լինել։
– Հասավ, թե ոչ, դա իրենց դատին պետք է թողնել (կախված այն հանգամանքից, թե ինչ նպատակ են հետապնդել), ես կարող եմ այս պահին աչքիս առջև ունեցած փաստերով դատողություններ անել: Սահմանադրական ճգնաժամը, ինչի մասին մի քանի ամիս առաջ խոսում էր իշխանությունը, ոչ թե այն ժամանակ, այլ հիմա է առկա: Իրավաքաղաքական կազուսային շրջափուլի մեջ ենք, ինչից դուրս գալու ճանապարհ չեմ տեսնում։ Եվ քանի որ իրավական մակարդակում այնպիսի լրջագույն խնդիրներ են ստեղծվել, որոնց լուծումները դժվար թե այս պահին կարողանան գտնել, ենթադրում եմ, որ դեռ երկար կմնանք իրավական այս անորոշ հորձանուտում։ Միակ հստակությունն այն է, որ այս պահին երկրում կա վարակ, և այն օրեցօր տարածվում է։
Զրույցը՝
Սևակ ՎԱՐԴՈՒՄՅԱՆԻ
Կարդացեք նաև
Հոդվածն ամբողջությամբ՝ «Իրատես» թերթի այսօրվա համարում:
