Ռուսաստանի Կենտրոնական ընտրական հանձնաժողովը հայտարարել է, որ քվեաթերթիկների 95 տոկոսի հաշվարկի արդյունքներով ընտրողների 77,92% կողմ է քվեարկել սահմանադրական փոփոխություններին: Վերջին տվյալներով՝ մասնակցությունը կազմել է 65%:
Սահմանադրական փոփոխությունների հարցով հանրաքվեն Ռուսաստանում անցկացվել է հունիսի 25-ից հուլիսի 1-ը: Այս փոփոխությունները թույլ կտան երկրի գործող նախագահ Վլադիմիր Պուտինին «զրոյացնել» նախագահական ժամկետը և առաջադրվել նախագահական ընտրություններին: Բացի այդ հիմնական օրենքում փոփոխություններ են լինելու Աստծո հանդեպ հավատքի մասով, ամրագրվելու է ամուսնության ինստիտուտը՝ որպես տղամարդու և կնոջ միջև միության (պետությունը ստանձնելու է այդ միությունը պաշտպանելու պարտավորությունը): Այս փոփոխությունները վերջին օրը մտցրել է անձամբ Պուտինը:
Ռուս ընդդիմադիր գործիչ Ալեքսեյ Նավալնին հայտարարել է, որ հանրաքվեի արդյունքները «կեղծ են և չեն արտահայտում ՌԴ քաղաքացիների կարծիքը»: Նրա խոսքով՝ քվեարկությունն անօրինական է և ապօրինի: Ընդդիմադիր գործիչը կոչ է արել սեպտեմբերին մասնակցել «խելացի քվեարկությանը», իսկ եթե «նրանք նորից գողանան ձայները, պետք է դուրս գալ փողոց», ասել է Նավալնին:
Պատրաստեց՝ Վիկտորյա ԱՆԴՐԵԱՍՅԱՆԸ
