Պարետատան նիստից հետո ճեպազրույցում ԿԳՄՍ նախարար Արայիկ Հարությունյանը դիմեց վաղը մեկնարկող միասնական ընդունելության քննությունների մասնակիցներին եւ նրանց ծնողներին ու հարազատներին: Նա ասաց. «Վաղն սկսվում են միասնական ընդունելության քննությունները, իսկ այսօր արդեն ներբուհական քննություններ են իրականացվել:
Ամիսներ առաջ, երբ կորոնավիրուսը նոր էր սկսում տարածվել, մենք լրջորեն քննարկում էինք քննությունների անցկացման հնարավորությունը: Մեր գործընկերների մի մասն ասում էր, որ դա հնարավոր չի լինելու, որովհետեւ իր մեջ որոշակի վտանգներ է պարունակում, բայց մենք ընդունելության մեկ քննություն անցկացնելու որոշում կայացրեցինք՝ յուրաքանչյուր դիմորդի համար ապահովելով անվտանգության բոլոր կանոնները: Ըստ դրա, ՀՀ 47 հիմնական կենտրոններում, որոնցից 17-ը Երեւանում է, 30-ը՝ մարզերում, հուլիսի 2-ին, 4-ին, 6-ին եւ 8-ին տեղի կունենան միասնական քննություններ: Ամենահագեցած օրը լինելու է ամսի 6-ը, երբ ամենաշատ դիմորդներն են մասնակցելու:
Այս ճեպազրույցին մասնակցելու իմ հիմնական նպատակն այն է, որ մենք դիմենք ծնողներին եւ դիմորդների բոլոր ուղեկցողներին՝ հնարավորինս զերծ մնալ քննական կենտրոնի մոտ ավանդական հավաքներից: Ես վստահ եմ, որ ձեր երեխաները կարող են ինքնուրույն հասնել քննական կենտրոններ: Եվ եթե դա հնարավոր չէ, այսինքն, նրանք պետք է այլ համայնքներից այստեղ գան, նրան ուղեկցի մեկ հոգի եւ հետո լքի այդ տարածքը:
Մենք շատ սերտ համագործակցում ենք ոստիկանության եւ մարզային իշխանությունների հետ: Ես ուզում եմ շնորհակալություն հայտնել նրանց այս ընթացքում քննական կենտրոնները քննություններին պատշաճ կերպով նախապատրաստելու համար: ԱԻՆ-ը նույնպես մեզ հետ ներգրավված է գործընթացում: Քննություններից առաջ տարածքներն ամբողջությամբ ախտահանվում են: Մենք ապահովել ենք սոցիալական հեռավորության պարտադիր պահանջը: Ձեր երեխաները ջերմաչափվելու են մուտք գործելիս քննական կենտրոններ: Այսինքն, անվտանգության բոլոր կանոնները պահպանված են: Ներկա են լինելու ԱՆ ներկայացուցիչներ, բուժանձնակազմի ներկայացուցիչներ:
Կարդացեք նաև
Բայց ամենակարեւորը այստեղ այն է, որ քննական կենտրոնի մոտ թույլ չտանք կուտակումներ, որպեսզի զարկ չտանք կորոնավիրուսի նոր ալիքի զարգացմանը»:
Վարչապետը լրացրեց՝ հույս ունի նաեւ, որ քննական կենտրոններում լինելու են հակահամաճարակային գծանշումներ, ինչին Արայիկ Հարությունյանը պատասխանեց դրական:
Աշոտ ՀԱԿՈԲՅԱՆ
