Aravot.am-ի տեղեկություններով, ՀՀ ԳԱԱ Մոլեկուլյար կենսաբանության ինստիտուտի տնօրեն Արսեն Առաքելյանի դոկտորական ատենախոսության հետ կապված խնդիրներ են ծագել: Aravot.am-ը պարոն Առաքելյանից հետաքրքրվեց՝ ինչո՞ւ է իր աշխատանքը վերադարձվել:
«Իմ ատենախոսությունը հետ չի ուղարկվել, իմ ատենախոսության վերաբերյալ բացասական կարծիք է ուղարկվել, որի պատասխանը ես կտամ, երբ որ խորհուրդը օր կնշանակի»,-ասաց նա:
Հարցին՝ պատրաստվում է հայտարարությա՞մբ հանդես գալ, Արսեն Առաքելյանը պատասխանեց. «Ուղղակի խորհրդի քննարկում կլինի, ես կպատասխանեմ գրախոսի կողմից բարձրացված հարցերին»:
Հիշեցնենք, որ ՀՀ ԳԱԱ Մոլեկուլյար կենսաբանության ինստիտուտի տնօրենի դոկտորականի պաշտպանությունը կայացել է անցյալ տարի դեկտեմբերին, գրախոսներն են Էմիլ Գեւորգյանը, Վալերի Առաքելյանը եւ Պիտեր Շտադլերը, գիտական խորհրդատուն՝ Լեւոն Ասլանյանը:
Կարդացեք նաև
Կապվեցինք նաեւ ՀՀ ԳԱԱ Մոլեկուլյար կենսաբանության ինստիտուտի գիտական աստիճաններ շնորհող կենսաքիմիայի խորհրդի քարտուղար Գոհար Մկրտչյանի հետ: Նա հրաժարվեց ատենախոսության վերաբերյալ մանրամասներ հայտնել՝ ասելով, որ Արսեն Առաքելյանի ատենախոսությունն իրենց խորհրդի ներքին խնդիրն է: «Երբ խորհուրդը նիստ հրավիրի, ինչ-որ բան հայտնի դառնա, դուք էլ կիմանաք»,-ասաց տիկին Մկրտչյանը:
Ինչ վերաբերվում է Արսեն Առաքելյանին, նրա անունը վերջին շրջանում սկսել է հոլովվել հայկական արտադրության կորոնավիրուսի թեստերի պատմության համատեքստում:
Գոհար ՀԱԿՈԲՅԱՆ
