«Անվտանգության ոլորտի կառավարումը Հայաստանի փոխակերպման համատեքստում» վեբինարի նպատակն էր հասարակության լայն շրջանակներում բարձրացնել անվտանգության ոլորտի արդյունավետ կառավարման եւ դրան ուղղված բարեփոխումների վերաբերյալ իրազեկվածության մակարդակը: Այն ԵԱՀԿ-ի «Հայաստանում անվտանգության ոլորտի կառավարման ամրապնդումը» ծրագրի շրջանակներում հանրային իրազեկման առաջին միջոցառումն էր:
Վեբինարին մասնակցեցին ՀՀ անվտանգության խորհրդի քարտուղար Արմեն Գրիգորյանը, ԱԺ պաշտպանության եւ անվտանգության հարցերով մշտական հանձնաժողովի նախագահ Անդրանիկ Քոչարյանը եւ ԵԱՀԿ աշխատանքային խմբի ղեկավար Ինիդ Միլոնը:
Արմեն Գրիգորյանը կարեւորեց ժողովրդավարությունը եւ ժողովրդավարացման գործընթացները Հայաստանում, այսպիսի ձեւաչափով Հայաստանում անվտանգության ոլորտի բարեփոխումների ընթացքը քննարկելը: «2018 թվականի հեղափոխությունից հետո Հայաստանում ժողովրդավարացման լայնամասշտաբ գործընթաց է սկսվել, որը վերաբերում է ոչ միայն ընտրական ինստիտուտին, քաղաքացիական հասարակությանը, պառլամենտին, այլեւ անվտանգության ոլորտին, որովհետեւ ժողովրդավարացման պրոցեսը համապարփակ պետք է լինի: Դա չպետք է վերաբերի միայն ու միայն ընտրական ինստիտուտին կամ կառավարման համակարգի մի մասին: Այն պետք է լինի համապարփակ եւ իր մեջ ընդգրկի նաեւ անվտանգության ոլորտը:
Ես նույնպես կարեւորում եմ ԵԱՀԿ-ի հետ համագործակցությամբ աննախադեպ այս գործընթացը, երբ միջազգային կառույցները, խորհրդարանը, անվտանգության սեկտորի կամ ինստիտուտի ներկայացուցիչները, ինչպես նաեւ քաղաքացիական հասարակությունը եւ ՄԻՊ ինստիտուտը փորձում են համատեղել ջանքերը անվտանգության ոլորտում բարեփոխումներ իրականացնելու համար: Մենք համոզված ենք, որ ժողովրդավարությունը բարձրացնելու է Հայաստանում անվտանգության մակարդակը եւ ավելի թափանցիկ դարձնելու, որովհետեւ ժողովրդավարության տրամաբանությունից եւ սկզբունքներից ամենակարեւորներից մեկը թափանցիկությունն է:
Կարդացեք նաև
Իհարկե, անվտանգության ոլորտում կա ընկալում եւ մոտեցումներ, թե ինչքան պետք է լինի այդ թափանցիկությունը՝ հաշվի առնելով Հայաստանի անվտանգության յուրահատուկ իրավիճակը, բայց մենք համոզված ենք, որ պետք է փորձենք անել ամեն ինչ առավել թափանցիկ լինելու, թափանցիկության այնպիսի մակարդակ ունենալու, որը չի վնասի անվտանգության համակարգին»,-ասաց ԱԽ քարտուղարը:
Աշոտ ՀԱԿՈԲՅԱՆ
