«Մարդկանց մոտ տպավորություն է ստեղծվել, որ ինչ-որ պաշտոնյայի մասնավոր նամակը կարող է կառույցի նամակ ներկայացնել»,- երեքշաբթի լրագրողների հետ զրույցում, անդրադառնալով Վենետիկի հանձնաժողովի նախագահ Ջիանի Բուքիքիոյի նամակին, որն ուղղված էր Սահմանադրական դատարանի նախագահ Հրայր Թովմասյանին, ասաց ԱԺ փոխնախագահ Ալեն Սիմոնյանը։
Նա հավելեց, որ երկու անձի անձնական նամակագրությունը չի վերաբերվում ո՛չ իրեն, ո՛չ Ազգային ժողովին․ «Պարոն Բուքիքիոյի նամակագրության մեջ ուղղակի թեզեր են, և եթե դուք էլ նմանատիպ ինչ-որ նամակով դիմեք, ես վստահ եմ, որ բովանդակության առումով գրեթե իրարից չեն տարբերվի»։
Ալեն Սիմոնյանը շեշտեց, որ Վենետիկի հանձնաժողովը խորհրդատվական մարմին է, որը արդեն իր եզրակացությունը տվել է․ «Այդ փաստաթուղթը անձնական է, դա պաշտոնական դիրքորոշում չէ, ուղղակի դրա մասին խոսելը ուղղակի շահարկումների, փրփուրներից կախվելու Հրայր Թովմասյանի փորձն է ուղղակի»։
Իսկ հարցին, թե մինչև սահմանադրական փոփոխությունների նախագծի ուժի մեջ մտնելը Հրայր Թովմասյանը գնաց արձակուրդ, արդյոք դա մարտավարական քա՞յլ էր, Ալեն Սիմոնյանը պատասխանեց․ «Հրայր Թովմասյանը, ինչպես ինքն էր բնորոշել, իր խրամատը որոշեց թողնել տիկին Ալվինա Գյուլումյանին, և դա կարծում եմ պարոն Թովմասյանին շատ բնորոշ է»։
Կարդացեք նաև
Ամի ՉԻՉԱԿՅԱՆ
