«Մեղադրանքներ են հնչում, թե ճգնաժամային պայմաններում մենք գույքահարկ ենք ավելացնում: Դա կամ սխալ ընկալման արդյունքն է կամ որոշ դեպքերում՝ միտումնավոր մանիպուլյացիա, որովհետեւ բուն նախագիծը, որը հանգեցրել է գույքահարկի ավելացման, դա կադաստրային արժեքների մոտարկման նախագիծն է, որն անցած տարի է ընդունվել: Հիմա այս նախագծով մենք այդ նախագծի «էֆեկտը» փորձում ենք մեղմել»,-այսօր կառավարության մամուլի կենտրոնում ասաց ԱԺ տնտեսական հարցերի հանձնաժողովի նախագահ Բաբկեն Թունյանն՝ անդրադառնալով գույքահարկի փոփոխությանը:
Նա ասաց, որ այսօր գործող համակարգը մի քանի շեմեր ունի եւ առավելագույն շեմը բնակարանի դեպքում 40 մլն դրամն է, որից հետո կիրառվում է առավելագույն մեկ տոկոս գործակիցը. «Վերագնահատման արդյունքում գույքերի մի զգալի մասը ընկնում է բարձր շեմի տակ եւ հարկը բազմապատիկ անգամներով էր ավելանում: Հիմա մենք այդ ազդեցությունն ենք մեղմելու, սահուն ժամանակահատված ենք դնում, որպեսզի վեց տարում բեռն անմիջապես չզգան: Եվ պետք է նկատի ունենալ, որ նոր կանոններով առաջին վճարումը կատարվելու է մյուս տարի դեկտեմբերին: Այսինքն, խոսել ճգնաժամային պայմաններում գույքահարկի բեռի ավելացման մասին, իմ կարծիքով՝ արդարացի չէ»:
Գույքահարկն ուղղվելու է համայնքային բյուջե, եւ ինչպես պատգամավորն ասաց, եթե մենք ցանկանում ենք ունենալ ֆինանսապես անկախ համայնքներ, համայնքներին նաեւ որոշակի եկամուտներ են պետք. «Այդ գումարները չեն ծախսվում նախարարների կամ պատգամավորների անձնական նպատակներով: Այդ գումարները ծախսելու է համայնքի ավագանին: Սրան զուգահեռ մենք բոլորս պետք է պահանջատեր լինենք եւ խիստ պահանջներ դնենք ավագանու առջեւ»:
Կարդացեք նաև
Նելլի ԲԱԲԱՅԱՆ
