Այսօր ԱԺ պատգամավորների նախաձեռնությամբ արտահերթ նստաշրջան է հրավիրվել: Օրակարգում «Սահմանադրական դատարանի մասին» եւ «Պաշտոնատար անձանց գործունեության ապահովման սպասարկման եւ սոցիալական երաշխիքների մասին» օրենքներում փոփոխությունների փաթեթն է: Սահմանադրական փոփոխությունները հակասում են այս օրենքներին:
«Իմ քայլի» պատգամավոր Սուրեն Գրիգորյանն ասաց, որ այս օրենքներով փոփոխվում է ՍԴ դատավորների թափուր տեղի համար առաջադրող մարմինների առաջադրման հերթականությունը: Առաջին առաջադրումը կատարվելու է կառավարության կողմից, երկրորդը՝ ՀՀ նախագահի, երրորդը՝ դատավորների ընդհանուր ժողովի: ՍԴ-ում այս պահին առկա 3 թափուր պաշտոնների համար այս հերթականությամբ են առաջադրելու: ՍԴ անդամներին, դատավորներին, որոնց լիազորությունները դադարել են վերջին օրենքով, նշանակվելու է կենսաթոշակ՝ օրենքով սահմանված կարգով:
ՍԴ-ի 3 թափուր պաշտոնների համալրումից հետո կընտրվի ՍԴ նոր նախագահ՝ 10-օրյա ժամկետում: Որպեսզի ՍԴ դիմած սուբյեկտների իրավունքները ապահովված լինեն, այն գործերը, վարույթները, որոնք մակագրվել են ՍԴ այն դատավորներին, որոնց լիազորությունները դադարեցված են, աշխատանքային քննարկմամբ պետք է վարույթները վերամակագրվեն այլ դատավորների:
«Իմ քայլի» պատգամավոր Հովիկ Աղազարյանը հարցրեց. «Ճի՞շտ եմ հասկանում, որ պետք է ՍԴ 9 անդամ լինի, որ ընտրեն նախագահ, եթե այդպես է, մենք տեսականորեն կարող ենք բավական երկար ժամանակ ՍԴ նախագահ չունենալ»: Սուրեն Գրիգորյանը պատասխանեց, որ այս պահին ՍԴ-ում շարունակում է պաշտոնավարել 6 դատավոր, թափուր հաստիքները համալրելուց հետո նոր նախատեսվում է ընտրել նախագահ, բայց սա չի նշանակում, որ անպայման պետք է լինի 9 դատավոր, որ ՍԴ նախագահ ընտրեն. «Տեսականորեն, կարող է այն 6 դատավորներից մեկի լիազորությունները դադարեն»:
Կարդացեք նաև
Հռիփսիմե ՋԵԲԵՋՅԱՆ
